வள்ளியின் பாதங்களை, முருகன் 'வருடி விடுவதாக' அருணகிரி மட்டுமே அடிக்கடி பாடுவாரு! வேறு யாரும் சொன்னதில்லை! ஏன்? * ஏன்-ன்னா அருணகிரியின் மனம் பேதை மனம்!
அவருக்கு நிறுவனக் கட்டுகள் கிடையாது! பெருமாளே-ன்னும் திருப்புகழில் முடிப்பாரு! வள்ளியின் காலைத் தொட்டான் முருகன்-ன்னும் பாடுவாரு! இப்படி யாருமே செய்ததில்லை! //பாகு கனிமொழி மாது குறமகள் பாதம் வருடிய மணவாளா// - திருப்புகழ் முருகன் இவ்வாறு செய்வதாக, கற்பனை பண்ணிப் பார்க்கும் போது...என் மனம் நினைத்தாலே இனிக்கும்!
பொதுவா புருசன் காலைப் பொண்டாட்டி பிடிச்சி விடுவதாகத் தான், சினிமாவில் காட்டிக் காட்டி, நம்மூருல பழக்கம்! திருமகள் "இதோ திருவடிகள்" என்று இறைவனைக் காட்டிக் கொடுப்பதற்காக அந்தப் பக்கம் அமர்ந்திருந்தால், அவளையும் கால் பிடித்து விடுபவளாக நம் சினிமா ஆக்கி விட்டது!:)
அம்மி மிதிக்கும் போது, "என் குலத்தை நீ தான் தாங்கணும்"-ன்னு, ஒரே ஒரு முறை மட்டும், பெண்டாட்டி காலைப் புருசன் பிடிப்பான் என்று தத்துவம் பேசுவாங்க! :) அதுக்கு அப்புறம் பிடிச்சா "ஆண்மைக்கு" இழுக்கு-ன்னு சமூகம் பேசும்! பொண்டாட்டி தாசன்-ன்னு வேற பட்டம் கட்டும்! :)
ஆனால் சேயோனாகிய முருகப் பெருமான், அடிக்கடி வள்ளியை ஏன் பாதத்தில் தொடணும்? ஆம்பளைப் பசங்க வேற என்னமோவெல்லாம் தானே தொடுவாய்ங்க? :) இதழ், கன்னம், அதுக்கும் கீழே, அப்படி இப்படி-ன்னு இருப்பதை விட்டுட்டு...என் முருகனுக்கு "அதுல" எல்லாம் வெவரம் போதாதா? :)))
வள்ளி, மாயோன் திருமாலின் மகள்! அவளுக்கு வைணவம் தான் பொறந்த வீடு! அப்போதே முருகன் மேல் மாறாத காதல், தீராத அன்பு! ஆனால் உடனே முருகனை மணக்க முடியவில்லை! தவம் இருக்க வேண்டும் என்று சொல்லப்பட்டது! பூவுலகக் காதலால் தான் ஆட்கொள்ளப் படுவாள் என்றும் சொல்லப் பட்டது! என்ன செய்வாள் பேதை? :(
வைணவக் கொழுந்தானவள், நம்பியின் மகளாகப் பிறக்கிறாள்! உலகத்தையே அளந்த மாயோனின் செல்வ மகள், காடு மேடு எல்லாம் அலைகிறாள்! எதற்கு காத்திருப்பு என்று தெரியாமலேயே, பாவம் அவளுக்குக் காத்திருப்பு! இத்தனைக்கும் முருகன் அவளிடம் ஆசையாக ஒரு வார்த்தை கூட முன்பு பேசியதில்லை!
இப்படி, தான் பார்க்காத ஒரு முருகனுக்காக, வீட்டில் பார்க்கும் எல்லா மாப்பிள்ளையும் தட்டிக் கழித்தாள்! சில சமயம் வீரமாய் விரட்டவும் விரட்டினாள்! :)
* முருகன் தன்னைக் காதலிக்கிறானா? = தெரியாது... * முருகன் வருவானா இல்லையா = தெரியாது... * இருப்பினும், அவன் அந்தமில் சீர்க்கு அல்லால் "வேறு எங்கும் அகம் குழைய மாட்டேனே"!
அவன் காதலிலேயே, அவள் ஆழ்ந்து இருந்தாள்! - Hymns Of The Drowning!
காடு மேடு எல்லாம், குகைகள் தோறும், கால் தேயத் தேய, மனமும் தேயத் தேய அலைந்து திரிந்தவள் வள்ளி! அதனால் தான் முருகப் பெருமான், அந்தத் தேய்ந்த போன வள்ளிப் பாதங்களைப் பிடித்துக் கொண்டான்! பிடித்து இன்னும் வருடிக் கொடுக்கிறான்!
இவள் எனக்காகவே மேலுலகில் நடந்து தேய்ந்தாளே, பின் அங்கிருந்து கீழே வந்து-வளர்ந்து, தினைப்புனத்தில் நடந்து நடந்து தேய்ந்தாளே! ஹைய்யோ! நடந்த கால்கள் நொந்தவோ இடந்த மெய் குலுங்கவோ?
//பாகு கனிமொழி மாது குறமகள் பாதம் வருடிய மணவாளா// இராமனின் பாதுகைக்கு "பாதுகா பட்டாபிஷேகம்"-ன்னு சொல்லுவாய்ங்க! ஆனால் காதல் பாதங்களுக்கு, காதல் முருகன் செய்யும், இந்தப் பாதுகா பட்டாபிஷேகம், எந்தப் பாதுகா பட்டாபிஷேகத்துக்கும் ஈடாகாது!
பாதம் வருடிய மணவாளா! பாதம் வருடிய மணவாளா! ஸ்ரீ வள்ளி என்றொரு படம்! அதற்கும் முன்பே KB சுந்தராம்பாள்-SG கிட்டப்பா மேடை நாடகம் மூலமாக...மிகப் பிரபலமான வள்ளித் திருமணக் கதை!
ஆனால் படமாக வந்த போது மெகா ஹிட்! காயாத கானகத்தே என்ற பாட்டும் இதில் தான்! TR மகாலிங்கம் முருகனாக நடிக்க-ருக்மிணி தேவி வள்ளியாக நடித்தார்! AVM என்ற நிறுவனத்துக்கு மாபெரும் முதல் வெற்றி!
ஆனால் பல நாள் கழித்து, சிவாஜி முருகன்-பத்மினி வள்ளியாக நடிக்க, இன்னொரு படமும் வந்தது! அது அவ்வளவு ஹிட் ஆகவில்லை! முன்பு முருகனாக நடித்த TR மகாலிங்கம், இதில் நாரதர்:) படத்தில் சுசீலாம்மா, சீர்காழி, TMS, சந்திரபாபு எனப் பலரும் பாடியுள்ளனர்! இனிமையான பாடல்கள்! அதில் ஒன்று...இன்று முருகனருளில்...
வலையேற்றித் தந்த தோழன் இராகவனுக்கு நன்றி!
உனக்காகவே பிறந்த அழகன் உனக்காகவே பிறந்த முருகன்
உனக்காகவே பிறந்த அழகன் திரு உருவான மால் மருகன் - வேல் முருகன்
நினைத்தாலே உள்ளமும் கனியாதா - செந்தமிழ் நிதியான பதியோடு மகிழ் வாய்த்ததா! இணையற்ற வீரன் குமாரன் - திரு முருகன் உனக்காகவே பிறந்த முருகன்!
படம்: ஸ்ரீவள்ளி வரிகள்: ? குரல்: TR மகாலிங்கம் இசை: ஜி.ராமநாதன் முருகா.....உனக்காகவே பிறந்த ஜீவனை உன்னிடமே சேர்த்துக் கொள்!
வாரணமாயிரம் சூழ வலம் செய்து ஏரக முருகன் ஏகின்றான் என்றெதிர் அவனுக்கே என்னை விதி என்ற இம்மாற்றம் நான் கடவா வண்ணமே நல்கு!
வீண் அபவாதத்தில் மாட்டிக் கொண்டு முழிக்கும் போது, ஆறு தலையால் ஆறுதல் கொடுத்து, ஆற்றும் ஆற்றுப்படை எது?
நக்கீரரின் திருமுருகு ஆற்றுப்படையா? = இல்லை!
இது திருப்புகழ் ஆறுதல்! அவனே தன் கரத்தால், மெல்ல மெல்ல வருடிக் கொடுத்து, ஆற்றுப்படுத்துவது!
ஆமாம்! இந்தத் திருப்புகழ் மிகவும் மனமுருக்கும் திருப்புகழ்!
மிகவும் நொந்த நிலையில் தற்கொலைக்கு முயன்ற அருணகிரி, முருகனால் காப்பாற்றப்பட்டு, சில பாடல்களைப் பாடத் துவங்கி இருந்தார்!
அந்த வேளையில் தான் என்னவோ, அவரின் பாசமே உருவான அக்கா = ஆதி, இளம் வயதிலேயே மரணம் அடைந்தார்!
* தனக்கு மணமாகா விட்டாலும், தம்பிக்கு முதலில் மணமுடித்து, அவன் காம வேள்வியைக் கட்டுப்படுத்த எண்ணியவர்!
* அப்போதும் அடங்காத தம்பி, குடும்பத்தையும் கவனிக்காது போகவே, தான் ஓடாய் உழைத்து, அவன் மனைவியையும் காத்தவர்!
* நோய் பீடித்த தம்பியை, தாய் போல் அரவணைத்துக் காத்தவர்!
* அப்போதும் காமம் அடங்காத தம்பி, அன்று சிரித்த கணிகையரால் இன்று ஒதுக்கப்பட்ட போது துடிதுடித்தான்! அடக்க முடியவில்லை! கதறினான்!
* அவன் படும் பாட்டைக் கண்டு, மனம் அடக்கத் தெரியாத தொழுநோய்த் தம்பிக்கு, "வா", என்று தன்னையே தரத் துணிந்தவர்!
* இந்த ஒரு வார்த்தை தான் அவனை ஒட்டு மொத்தமாய் புரட்டிப் போட்டது!
தாயினும் மேலான ஆதி அக்கா! தன் தாய் = முத்தை அவன் சரிவரக் கண்டதில்லை! அந்த முத்து = இந்த ஆதி! 'முத்தை'த் தரு பத்தித் திருநகை...என்று தாயாகவே துவங்கியது திருப்புகழ்...
அந்த அக்கா தான் இப்போ மரணமுற்றுக் கிடக்கிறார்கள்! இவனோ இப்போது அருணகிரி"நாதர்" ஆகி விட்டான்!
இருந்தாலும் இவனுக்கு உடைத்துக் கொண்டு வருகிறது!
ஊர் அரசல் புரசலாக ஏசுகிறது - இவள் வாழ்வு இப்படிப் பாழாய்ப் போனதற்கு இந்த அருணகிரி'நாதரே' காரணம்!!!
அதை எண்ணியெண்ணி அவன் தலம் தலமாகத் திரிய ஆரம்பிக்கின்றான்!
பழனியில் ஒரு பாலகன்!
அவன் தான் இவன் மனத்தை மயிலிறகால் வருடிக் கொடுக்கிறான்!
மனத்தை ஒருமைப்படுத்த, கையில் ஜபமாலையும் கொடுக்கிறான்! செபமாலை தந்த சற் குருநாதா என்று பாடுகிறார் அருணகிரி...பழனி மலையில்!
அபகார நிந்தை பட்டு - நான் உழலாதே ...முருகா... செபமாலை தந்த சற் குருநாதா
செபமாலை தந்த சற்......குருநாதா திருவாவி னன்குடிப்........பெருமாளே!
மிகவும் எளிமையான திருப்புகழ்! பொருளே சொல்லத் தேவையில்லை! அவனே பொருளாக ஆகி விட்டான்!
இபமா முகன் = யானை முகன்; இமவான் மடந்தை = இமவான் பெண்ணான பார்வதி
திருவாவினன்குடி என்பது தான் உண்மையான படைவீடு! இது பழனிமலைக்கு கீழே உள்ள ஆலயம்!
குன்று இருக்கும் இடமெல்லாம் குமரன் இருக்கணும் என்ற மக்களின் பேச்சு வழக்கால், பின்னாளிலே மலை மேல் போகர் ஒரு ஆலயம் அமைக்க...,
அந்த ஆண்டிக் கோலச் சிலையாலும் கதையாலும், மலைமேல் உள்ள ஆலயம் மிகுத்த புகழைப் பெற்று விட்டது!
இருப்பினும், பழனி செல்லும் போது, கீழேயுள்ள திருவாவினன்குடி ஆலயத்தையும் தரிசித்து வாருங்கள்!
மயில் மேல் காலை மடித்து, ஒயிலாய் அமர்ந்த என் முருகனைக் கண்ணாரக் கண்டு வாருங்கள்! அபகார நிந்தை பட்டு - நான் உழலாதே செபமாலை தந்த சற் குருநாதா
முருகா.....அபகார நிந்தையில் ஆறுதல் கொடு! அணைத்துக் கொள்!
இன்று என் ஆசைத்திரு முருகனுக்குப் பிறந்தநாள்! (Jun 13-2011 வைகாசி விசாகம்) Happy Birthday da, MMMMMMuruga! :) இனிய பிறந்தநாளில் இனியது கேட்டு, உனக்கு என்றும் பல்லாண்டு பல்லாண்டு!
ஒவ்வொரு ஆண்டும் மூன்று பிறந்தநாட்கள் எனக்கு ரொம்பவும் பிடிக்கும்! - முருகன், தோழி கோதை, ..... ! முருகன் 'பிறவான் இறவான்' என்கிற வசனம் உள்ளதால், அவன் 'உதித்த' நாள் என்றும் கொள்ளலாம்! எதுவானாலும் என்னவனுக்கு "Happy" Birthday!:) வைகாசியில் வரும் விசாக நட்சத்திரத்தில் உதித்ததால், விசாகன் என்ற பெயரும் அவனுக்கு உண்டு! அருவமும் உருவும் ஆகி, அனாதியாய்ப் பலவாய் ஒன்றாய்ப் பிரமமாய் நின்ற சோதிப் பிழம்பு அதோர் மேனியாகக் கருணைகூர் முகங்கள் ஆறும், கரங்கள் பன்னிரண்டும் கொண்டே ஒருதிரு முருகன் வந்து, ஆங்கு உதித்தனன் உலகம் உய்ய!!!
அந்த விசாக-விசால மனத்தவனுக்கு, என் மேல் மட்டும்...அப்பப்போ ஊடல் வரும்! போடா-ன்னு எனக்கும் கோவம் வரும்! அந்த நேரம் பார்த்து, சில பேர் என்னிடம் வந்து கேட்பாய்ங்க! - "முருகன்-ன்னு ஒருத்தரு இருக்காரு-ன்னு நல்லாத் தெரியுமா? இதெல்லாம் கற்பனை தானே?"
ஹா ஹா ஹா! கற்பனை என்றாலும்...கற்சிலை என்றாலும்... கந்தனே என் சொந்தனே! ஊடலும் உனக்கே, கூடலும் உனக்கே, ஆவியும் உனக்கே, நான் மொத்தமாய் உனக்கே!
குரல்: TMS வரிகள்: வாலி திருச்சி ரயில் நிலையம்! வண்டியில் உட்கார்ந்து கொண்டு இருந்தவர் பிரபல பாடகர் TMS! அவரிடம் இளைஞர் ஒருவர் தயங்கித் தயங்கித் தான் எழுதிய பாட்டைக் காட்டுகிறார்! பாட்டைப் பார்த்தவுடனேயே TMS-க்கு பிடித்து விட்டது! ஏன்-னா பாட்டிலேயே சந்தமும் இருக்கு! அங்கேயே மெல்லிதாய்ப் பாடிப் பார்க்க....கற்பனை என்றாலும், கற்சிலை என்றாலும்... இளைஞர், கவிஞர், வாலி.....பலருக்கும் அறிமுகமாகி, பெரும்புகழ் பெற்றார்!
வைகாசி விசாகம், இன்னும் இரண்டு பேரின் பிறந்தநாளும் கூட! * ஒரு குழந்தை = முத்தமிழ் முருகன் * இன்னொரு குழந்தை = அத்தமிழில் வேதம் செய்த மாறன் - நம்மாழ்வார்! இருவருக்கும் பிறந்த நாள் வாழ்த்துக்கள்!
முருகா..... என் மேல ரொம்ப கோவப்படாதே-ன்னா? நான் நினைப்பதும் நீ நிகழ்வதும்.....நின் செயலாலே! கரெக்ட்டு தான்! ஆனா இதையும் தெரிஞ்சிக்கோ... காண்பதெல்லாம் உந்தன் கண் விழியாலே!
நான் உன் கண்களின் வழியாகவே! = கண்களின் வார்த்தைகள் புரியாதோ? காத்திருப்பேன் என்று தெரியாதோ? Happy Birthday Honey! :)
பொதுவாக, இறைவனை வீதியுலாவுக்கு எழுந்தருளப் பண்ணும் போது, சிற்சில சமயம், நடையழகு காட்டப்படும்! 1. சிம்ம கதி = சிங்க நடை 2. கஜ கதி = ஆனை நடை 3. அஸ்வ கதி = புரவி நடை 4. ஹம்ஸ கதி = அன்ன நடை 5. சர்ப்ப கதி = அரவு நடை
* துவக்கத்தில் சிம்மம் போல் உதறிப் புறப்படுதல், * மெல்ல யானை போல் நடந்து, * பின்பு குதிரை வேகம்! * திரும்பி வரும் போது, களைப்பால் அன்ன நடை! * கடைசியில், பாம்பு புற்றுக்குள் போகும் போது, தலையைப் படக்-ன்னு எட்டிப் பார்த்து, மொத்தமும் சுருட்டிக்கும்! அது போல் கருவறைக்குள் படக்-ன்னு புகுதல்! = இதுவே நடையழகு!
இதெல்லாம் தோளில் சுமந்து வரும் போது மட்டுமே சாத்தியம்; தேரிலோ, வண்டிச் சகடையிலோ வைத்து இழுத்து வரும் போது சாத்தியப்படாது!
ஒரு சில வைணவத் தலங்களில் மட்டுமே, இந்தத் தோளில் கதி போட்டு, உலா வருவதைக் கவனித்துள்ளேன்! அதுவும் நாட்டியம் ஆடி ஆடி அழைத்து வரும் அழகு! மற்ற வைணவக் கோயில்களும் கூட நடையழகு கிடையாது! வெறும் சகடை தான்!
சென்னை, கபாலீஸ்வரர் கோயிலில் கொஞ்ச நேரம் தோளில் லேசாக ஆட்டினாலும், உடனே சகடைக்கோ, தேருக்கோ மாற்றி விடுவார்கள்! நடையழகு பூரணமாக இருக்காது! திருவாரூரில் அஜபா நடனம்; திருவண்ணாமலையில் அதே போல! ஆனால் அங்கும் சகடையில் ஏற்றி விடுவார்கள்! ஈசன் = நடன நாயகன் அல்லவா! ஆனால் என் முருகன்?
இதைப் பார்க்கும் போதெல்லாம் மனசு அடிச்சிக்கும்! என் முருகனுக்கு இப்படிப் பண்ண மாட்டாங்களா, பண்ண மாட்டாங்களா-ன்னு!
முன்னால் கும்பலாய் தமிழ் ஓதி வர, இறைவன் தமிழுக்குப் பின்னால்! வடமொழி சொல்றவங்க சொச்சம் பேரு, இறைவனுக்கும் பின்னாடி கொஞ்சமாய் ஓதி வருவாங்க!
இவருக்கே இம்புட்டு கெத்து-ன்னா, என்னவன் முருகன் = மாப்பிள்ளை! அவனுக்கு எம்புட்டு கெத்து இருக்கும்! போங்கடா! :) என் முருகனும் இப்படியெல்லாம் தோளிலே ஆடி ஆடி வரும் நாள் வரும்! தமிழ் ஓதி வரும் நாள் வரும்!
அது வரை, நான் உன்னை நடையழகு செய்விக்கிறேன்-டா, Darling Muruga! Come on Honey, Letz dance! :)
* காவடிச் சிந்து ஒன்னை இன்று அவசரம் அவசரமாய் எழுதினேன்! * படம் ஒருவன் பிறந்தநாளுக்கு வரைந்தது! * அத்தனையும் இங்கே என் முருகனுக்கே இட்டு.....இதோ...காதல் காவடிச் சிந்து :) (தந்தனத் தன, தந்தனத் தன, தந்தனத் தன, தந்தனத் தன - என்ற மெட்டிலான காவடிச் சிந்து)
வண்ண மயில் தோகை ஒன்று, முன்ன மாகப் பின்னி வைத்து அங்கும் இங்கும் ஆடிஆடி நோக்குதே - கந்தன் அழகு மயில் என்னை உற்றுப் பாக்குதே! நெற்றி மேலது நீலச் சுட்டியும், பேசும் வாய்மொழி வெல்லக் கட்டியும் விட்டுவிட்டு என்னை வந்துச் சீண்டுதே - கைகள் தொட்டுத்தொட்டுக் கொஞ்சி என்னைத் தீண்டுதே! (1) ------------------------------------------------------------
பழனி மலையதும், சாமி மலையதும், தணிகை மலையதும், சோலை மலையதும் வாடி வாடி என்று என்னைக் கூவுதே - பரங் குன்றும் செந்தூர் அலையும் காலை நீவுதே! ஆறு ஊர் படை, வீடு மீதினில், நானும் அவனொடு, சேர்ந்து வாழ்ந்திட ஆசை ஆசை என்று என்னை ஏவுதே - உள்ளம் பாகில் ஊறும் பாலைப் போலப் பாவுதே! (2) ------------------------------------------------------------
கந்தன் வந்தெனைக் கூட்டிச் செல்வேன், காலம் முழுவதும் காத்து நிற்பேன் சொல்லி என்தன் மூச்சையும் முகர்ந்தனன் - சொக்கி ஈர இதழில் இன்பத் தமிழைப் பகர்ந்தனன்! வேலும் ஆடிட, மயிலும் ஆடிட, சேவற் கொடியும் சேர்ந்து ஆடிட வேகம் வேகம் ஆக வேலன் கூடினன் - என்னுள் வேண்டி வேண்டி என்னென்னமோ தேடினன்! (3) ------------------------------------------------------------
தந்தனத் தன, தந்தனத் தன, தந்தனத் தன, தந்தனத் தன ஆடி ஆடி மேனி யெல்லாம் வேர்த்தனன் - ஐயன் தாவித் தாவித் தாகம் எல்லாம் தீர்த்தனன்! மரகதத் திரு, மயில் அணித் திரு, மாயவன் தன், மகள் எனக்கொரு காதலோடே ஆசை நடை நடந்தனன் - நான் காணும் முன்னே வாசலைக் கடந்தனன்! ஐயோ காணும் முன்னே வாசலைக் கடந்தனன்! (4) ------------------------------------------------------------
காணும் முன்னே வாசலைக்க-டம்பன் அந்தப் பாவி மீண்டும் வேணும் என்றே வாசலை அடைந்தனன்!! - நீ வேணும் என்றே என்னையும் அடைந்தனன்!! - முருகன் வேணும் என்றே என்னையும் அடைந்தனன்!!
இசைக் குயில் எம்.எல்.வி! MLV - Madras Lalithangi Vasanthakumari! இவர்களை அறியாதவர்கள் இருக்க முடியாது!
கர்நாடக இசை, சினிமா இசை என்று பல துறைகளில் முத்திரை பதித்தவர்! ஒரு காலத்தில் (இன்றும்) MLV-இன் திருப்பாவை ஆடியோ கேசட்டுகள் விற்றுச் சக்கை போடு போட்டன!
MLV - நடிகை ஸ்ரீவித்யா அவர்களின் தாயார்! இன்றைய முன்னணிக் கலைஞர்களான சுதா ரகுநாதன், A.கன்னியாகுமரி போன்றவர்களின் குருவும் கூட!
கண்ணன் மேல் உள்ள புரந்தரதாசரின் கன்னடக் கீர்த்தனைகளை இசை உலகில் பரவச் செய்ததில் பெரும் பங்கு MLV-க்கே!
மணமகள் படத்தில் பாரதியாரின் "சின்னஞ் சிறு கிளியே" பாடி, குறுகிய காலத்தில் மிகப் பிரபலம் ஆனவர்!
அறிஞர் அண்ணாவின் ஓர் இரவு படத்தில், "அய்யா சாமி" பாடலைப் பாடியதும் இவரே! ராஜா தேசிங்கு படத்தில் இவர் பாடிய "பாற்கடல் அலை மேலே பாம்பணையின் மேலே" பாட்டு தான் நாளடைவில் பரதநாட்டியப் பாட்டாக மாறி விட்டது! :)
இன்று முருகனருளில்...
MLV-இன் முருகான முருகன் பாட்டு - குயிலே, உனக்கு அனந்த கோடி நமஸ்காரம்....
தமிழ்க் கடவுள் என் முருகனுக்கு எதுக்குய்யா "நமஸ்காரம்"? :) ஆனாலும் பாடல் அருமை!
மிகவும் அபூர்வமான பாட்டு! எம்.எல்.வி இளமைக் காலப் பாட்டு - சர்ச்சைகளுக்கு உள்ளான மனிதன் திரைப்படத்தில் இருந்து...
குயிலே உனக்கு அனந்த கோடி நமஸ்காரம் குமரன் வரக் கூவுவாய் - நீ
(குமரன் வரக் கூவுவாய்)
மலை மாங்கனிச் சோலையிலே மதுவாய் எனையே பிழிந்த
(குமரன் வரக் கூவுவாய்)
வருவார் வருவார் என்றே வழி பார்த்தே விழி சோர்ந்தே மாரன் கணைகள் அல்லால் வீரன் வரக் காணேனே!
(குமரன் வரக் கூவுவாய்)
எனக்கும் இன்று பிறந்தநாள் தான்! = மீண்டும் முருகனருள்/கண்ணன் பாட்டில் எழுதவொரு இனிய பிறந்தநாள்!
இரண்டுக்கும் ஒன்றாய்........முருகா என்று வாழ்த்துவோமா? :)
இவனுக்கு மூன்று முகம் :)
இவன் தலைவனுக்கு ஆறு முகம்! :)
நம்ம ஜிரா என்னும் கோ.இராகவனுக்கு இன்று, (May-27-2011) இனிய பிறந்த நாள் வாழ்த்து சொல்லுங்க, மக்கா! :)
ஒரு ஊர்ல...ஒரு நாள்....சில்க் ஸ்மிதா + முருகன் + ஜிரா - மூவரும் சந்தித்த பதிவு இங்கே! :) Happy Birthday Ragava :)
கே.பி. சுந்தராம்பாள் - என்னை மிகவும் பாதித்து விட்ட ஒரு பெயர்!
காதல் மனம் என்றால் என்ன?
Kodumudi Balambal Sundarambal! அவருடைய "அக வாழ்வை" ஒட்டி, முன்பு இட்ட பதிவு இங்கே!
முன்னம் அவனுடைய நாமம் கேட்டாள்
பின்னம் அவனுடைய ஆரூர் கேட்டாள்
பேர்த்தும் அவனுக்கே பிச்சி ஆனாள்!
தன்னை மறந்தாள் தன் நாமம் கெட்டாள்
தலைப்பட்டாள் நங்கை தலைவன் தாளே!
KBS அம்மாவின் முருகக் குரலில், பிறந்த நாள் பஞ்சாமிர்தம் சாப்பிடுவோமா? இதோ பாடுறாங்க பாருங்க! = ஜெயமுண்டு பயமில்லை வேல் வேல்!
பழனி மலை மீதிலே
குழந்தை வடிவாகவே
படைவீடு கொண்ட முருகா
பால் பழம் தேனோடு,
பஞ்சாமிர்தம் தந்து,
பக்தரைக் காக்கும் முருகா!
ஜெயமுண்டு பயமில்லை வேல் வேல்! - சக்தி
வடிவுண்டு, மயிலுண்டு, கொடியுண்டு! வேல் வேல்!
ஜெயமுண்டு பயமில்லை வேல் வேல்!
(பழனி மலைத் தங்க ரதக் காட்சிகள்...)
வடம் இட்ட பசும் தங்கத் தேரு
எங்கும் ஒளி சிந்த இழுக்கின்ற, கரம் பல நூறு
இடைத் தொட்ட கைக்கொண்ட பிள்ளை - எங்கள்
இயல் இசை நாடகத் தமிழுக்கு எல்லை!
வேல் வேல்!
சக்தி வேல் வேல்!
வெற்றி வேல் வேல்!
ஞான வேல் வேல்!
*********************************
என் கண்ணாளா முருகா....
கூப்பிட்ட குரலுக்கு யார் வந்தது?
குழந்தையின் வடிவிலே யார் வந்தது?
நீறிட்ட நெற்றியுடன் யார் வந்தது?
நெஞ்சம் துடிக்குதே யார் வந்தது?
யார் வந்தது? யார் வந்தது?......
படம்: துணைவன்
குரல்: கே.பி.சுந்தராம்பாள்
வரி: அ. மருதகாசி ?
இசை: கே.வி.மகாதேவன்
இன்று கிருத்திகை. முருகனை நினைக்க நல்லது நடக்கும் நாள்.நீண்ட நாட்களுக்குப் பிறகு என்னுடைய பதிவு முருகன் அருளில் அவன் அருளால். முருகனை குழந்தையாக பாவித்து திரு. நீலகண்டசிவன் அவர்களெழுதிய பாடல். திருமதிகள் ரஞ்சனி- காயத்ரி அவர்கள் மிகவும் அருமையாகப் பாடியுள்ளனர். கேட்டுப் பாருங்கள்.கிருத்திகை பதிவைத் தொடர முருகன் அருளை வேண்டி இந்தப் பதிவை அளிக்கிறேன். ராகம்: ரீதிகௌள
பல்லவி
ஓராறு முகனே அன்னைஉமையாள் திரு மகனே...ஓராறு
அனுபல்லவி
ஈராறுகரனே எனக்கும் உன்கருனை பராய் என் கண்ணே என் பாலசுப்ரமண்யா....ஓராறு
சரணம்
ஓங்கார பொருளே அருள்மறை ஓளிபடவரும் முதலே நீங்காது எனதுள்ளெ மேவி அருளும் திரு நீலகண்டம் அருமை பாலகனே பரனே....ஓராறு
அவரைப் பற்றி, பலரும் பலவும், புகழ்ந்தும் இகழ்ந்தும் பேசினாலும், காணொளியில் நுணுக்கினாலும்.... ஒரே புள்ளி: Sai Baba is "also" a Social Worker! So, let his soul rest in peace!
* "ஸ்வாமி நீலு" என்று கிராமத்துப் பெண்கள் சொல்லும் வறண்ட கிராமக் குடிநீர் * மாணவர்களிடம் வசூல் செய்யாத "கல்வித் தந்தை" * நோயாளிகளிடம் வசூல் செய்யாத "மருத்துவத் தந்தை" * Very few places in India for a free open heart surgery! * தமிழால் வளர்ந்து தமிழரை அழிப்பது போல், ஆன்மீகத்தால் வளர்ந்து ஆன்மீகத்தை அழிக்கவில்லை!
பெரியவர் இரணியகசிபு: "அஹம் பிரம்மாஸ்மி = நான் கடவுள்!" பிள்ளைப் பிரகலாதன்: "மனிதன் குற்றங் குறை உடையவனே! அவன் 'பகவான்' அல்லன்! பகவானை அடைபவன்!"
மனிதரை மரணத்திலே இழிவு செய்யாமல் அவர் ஆன்மா அமைதியுற வேண்டுவோம்!! சத்ய சாயி பாபா அவர்கட்கு அஞ்சலி! அவர் குரலில் ஒலிக்கும், முருகன் பாடல்.....இன்று இங்கே! இதோ!
முருகன் என்னும் ஒரு அழகன் அவன் பழகும் அழகில் மிக இனியன் தந்தை நுதல் தந்த கனல் தன்னில் மணம் வீசும் மலராய் அவன் உதித்தான் இதழ் விரித்தான் சிரித்தான் அவன் மணத்தான்
சரவணப் பொய்கையில் பிறந்தான் அவன் ஆறுரு வாகவே பிரிந்தான் கங்கை பெண்டிர் தம் சிசு வாகி அவர் அன்பில் வச மாகி தவழ்ந்தான் அவன் வளர்ந்தான் மகிழ்ந்தான் அவன் சிறந்தான்
உமையவள் குமரனை கண்டாள் அவனைக் கண்டதும் பேரன்பு கொண்டாள் மைந்தன் அறுமுகனை இரு கரத்தால் அவள் எடுத்தாள் சேர்த் தணைத்தாள் ஒன்றாய் மிக நன்றாய் கண்டாய் மலர்ச் செண்டாய்
வேலொடு மயில் தனில் ஏகும் அவன் பதங்களே வழித் துணையாகும் செந்தில் முருகன் எனும் அழகன் அவன் கந்தன் எனும் கருணை குகன் குளிர்வான் மனம் மகிழ்வான் கனிவான் அருள் பொழிவான்
திரு=செல்வம்; என்ன செல்வம்? திரு வளர் சுடர் = வளர்ந்த சுடர்; வளர்கின்ற சுடர்; வளரும் சுடர் இப்படி, எப்போதும் வளர்ந்து கொண்டே இருக்கும் செல்வம் எது?
செல்வம்-ன்னா செல்வம், செல்வோம், செல்வோம் அல்லவா? செல்வம் தேயும் அல்லவா? இன்னிக்கே இல்லீன்னாலும் கொஞ்சம் கொஞ்சமா! அது எப்படி செல்வம் வளர்ந்து கொண்டே இருக்கும்! திரு வளர் சுடர் என்கிறாரே பாம்பன் சுவாமிகள்? என்ன செல்வத்தைச் சொல்லுறாரு? = நீங்காத செல்வம்! நீங்காத செல்வம் நிறைந்தேலோ ரெம்பாவாய்! அது என்ன நீங்காத செல்வம்?
எம்பெருமானே நம்மை விட்டு நீங்காத செல்வம்! மற்ற எதுவாயினும், தாயே ஆயினும் நீங்க வல்லது! இந்தப் பிறவிக்கு ஒரு தாய்! ஆனால் ஒவ்வொரு பிறவியிலும் கூட வரும் ஒரே தாய்! அதுவே நீங்காத செல்வம்! தேயாமல் வளர் செல்வம்! = முருகச் செல்வம்!
அதான் "திரு" என்று மந்திரப் பூர்வமாக, இந்தத் துதியின் துவக்கத்தில் திருவை வைக்கிறார்! கூடவே இறைவனைச் சுடராக வைக்கிறார்! = அருட் பெருஞ் ஜோதி!
ஒளிக்குப் பேதம் ஏது? சிவன், பெருமாள், முருகன், கணபதி, அம்பிகை, அல்லா, பிதா-சுதன்-பரிசுத்த ஆவி, இயேசுநாதப் பெருமான், தீர்த்தங்கரர், மகாவீரர், புத்தர் என்று சொல்லிப் பாருங்கள்! ஆட்கள் தனித்தனியாக அணி பிரிவார்கள்! ஆனால் தோற்றமாய் நின்ற சுடரே துயில் எழாய் என்று சொல்லிப் பாருங்கள்! அனைவருக்கும் ஏற்புடைத்தாகவே இருக்கும்!
பரிபூர்ண இருள் என்று ஒன்று இல்லவே இல்லை! எத்தனை இருட்டிலும், கொஞ்சம் கண் பார்க்கப் பழகிய பின், சிறு ஒளியாவது தென்படும்! அது போல், எத்தனை துன்பத்திலும், இறைவன் சிறிதாவது தென்படுவான்! அதுவே ஒளியின் பெருமை! அதனால் தான் பல இலக்கியங்கள் உலகத்தை வைத்தே துவங்கினாலும், அதோடு கூடவே ஒளியையும் சேர்த்து வைத்தே துவங்குகின்றன!
உலகம் உவப்ப பலர் புகழ் ஞாயிறு = திருமுருகாற்றுப்படை திங்களைப் போற்றுதும், ஞாயிறு போற்றுதும் = சிலப்பதிகாரம் வையம் தகளியா, வெய்ய கதிரோன் விளக்காக, செய்ய சுடராழியான் அடிக்கே = ஆழ்வார் அருளிச் செயல் உலகெலாம் உணர்ந்து ஓதற்கு அரியவன், அலகில் சோதியன் = பெரிய புராணம்
இப்படித் தோற்றமாய் நின்ற சுடரையே, பாம்பன் சுவாமிகளும் துவக்கத்தில் வைக்கின்றார்!
திரு வளர் சுடர் உருவே = முருகச் செல்வம் சுடராய் ஒளி வீ்சும் உருவே சிவை கரம் அமர் உருவே = சிவையாகிய உமை அன்னையின் கரத்தில் தவழும் உருவே அரு மறை புகழ் உருவே = மறைகள் புகழும் உருவே அறவர்கள் தொழும் உருவே = அறமே உருவான சான்றோர்/அறவர் தொழும் உருவே
இருள் தபும் ஒளி உருவே = தபு-ன்னா மறைந்து போதல்! (சினிமா நடிகையின் பெயர் அல்ல :) இருள் தபும் = இருளைப் போக்கும் ஒளி உருவே என நினை எனது எதிரே = என்று ஒளி வண்ணமாக என் முருகனை நினைத்த மாத்திரத்தில், எனது எதிரே...அவன்!
குரு குகன் முதல் மயிலே = குருவான குகப் பெருமானின் முதலான மயிலே! அது என்ன முதல் மயில்? ஏதாச்சும் ஓட்டப் பந்தயத்தில் மயிலார் முதலில் வந்தாரா என்ன? :) வியாபாரத்தில் முதல் போடுகிறோமே! அது போல்...நம்மை ஆட்கொள்ளும் வியாபாரத்தில் முருகன், மயிலையே முதலாக வைக்கின்றான்!
முதலை வைத்துத் தான் பல செயல்களை நிகழ்த்த முடியும்! உழைப்பவர்க்கு கூலி கொடுக்க முடியும்! முன்பு சூரனை அழித்தாலும், ஆணவம் மட்டுமே அழித்து, அவனை அழிக்காது, மயிலாய் தன்னிடமே இருத்திக் கொண்டதைப் போல, நம்மையும், நம் பாவங்களை மட்டுமே அழித்து, நம்மை அழிக்காது ஆட்கொள்வான்! இந்த நம்பிக்கை நமக்கு வருவதற்குத் தான், இந்த வியாபாரத்தில், மயிலை முதலாய் வைக்கிறான் முருகன்! அதான் குருகுகன் முதல்மயிலே!
கொணர்தி உன் இறைவனையே = உன் இறைவனை வேகமாகக் கொணர்ந்து, என் முன்னே நிறுத்து! முருகனை முன்னே நிறுத்து!
200ஆம் பதிவின் பழனித் திருப்புகழைக் கண்டு, இந்தப் பதிவின் பாடலையும், ஒலிச் சுட்டியோடு அனுப்பி வைத்த திரு.பிரகாசம் ஐயா அவர்களுக்கு என் முருக நன்றிகள்! பல முறை, தானாகவே முன் வந்து, பல திருப்புகழ்ப் பாடல்களின் ஒலிக்குறிப்பை முருகனருள் வலைப்பூவுக்கு அனுப்பி வைத்திருக்கிறார் என்றால்... இந்த வலைப்பூ, அன்பர்களின் மத்தியில் எத்தனை அன்பைப் பெற்றிருக்கு-ன்னு நல்லாவே தெரிய வருது! அதை நல்ல முறையில் கட்டிக் காத்து, பொங்கு நீர் புரந்து பாயும் பூம்பொழில் அரங்கமாக, என்றும் முருக மணம் கமழும் சோலையாக, அடியார்கள் அவனுக்காக இளைப்பாறும் முருக இடமாக... இதை நடத்திச் செல்ல வேண்டும் என்றும் முருகனருள் குழுவினைப் பிரார்த்தித்து...இதோ!
இந்தத் திருப்புகழைப் பாடுபவர்: பாண்டிச்சேரி திரு சம்பந்த குருக்கள்
தேவாரப் பண்ணிசை மிகச் சிறப்பாகப் பாடக் கூடியவர்! திருச்செங்கோட்டில் பெண் எடுத்துள்ளார்! சென்ற ஆண்டு சிவராத்திரி தினத்தில் இரவு முழுதும் திருச்செங்கோடு திருமலையில் தேவாரப் இசையை மிகச் சிறப்பாகப் பாடினார்! அப்போது ஒரு நண்பர் கொடுத்த CDயில் இருந்து இவர் பாடிய திருப்புகழ்ப் பாடல்களைப் பிரதி எடுத்து வைத்து, இது இடப்படுகின்றது!
அவனி தனிலே பிறந்து, மதலை எனவே தவழ்ந்து அழகு பெறவே நடந்து ...... இளையோனாய் அரு மழலையே மிகுந்து, குதலை மொழியே புகன்று அதி விதமதாய் வளர்ந்து ...... பதினாறாய்
அவனியில் பிறந்து, குழந்தை போல் தவழ்ந்து, பின்பு நடந்து, உளறி, பேச்சு வந்து, இளமை முறுக்கு பெற்று, விதம் விதமாய் வளர்கிறோம்... சிவகலைகள் ஆகமங்கள், மிகவு மறை ஓதும் அன்பர் திருவடிகளே நினைந்து ...... துதியாமல் தெரிவையர்கள் ஆசை மிஞ்சி, வெகு கவலையால் உழன்று திரியும் அடியேனை உன்றன் ...... அடிசேராய்
16 சிவகலைகள், ஆகமம், மறையோதுபவர்களை நினைக்காது, சில பெண்கள் பால் ஆசை மிஞ்சிப் போய்....அவர்கள் வேண்டும் வரை சிரித்து பின்பு புறக்கணித்து...அதனால் கவலையால் உழன்று திரிகிறேன்! தேவையா? உன் அடியில் சேர்த்து விடேன்!
மவுன உபதேச சம்பு, மதி அறுகு வேணி தும்பை மணி முடியின் மீதணிந்த ...... மகதேவர் மன மகிழவே அணைந்து, ஒருபுறம் அதாக வந்த மலைமகள் குமார துங்க ...... வடிவேலா
மாணிக்கவாசகருக்கு, விரலை மட்டுமே காட்டி, மவுன உபதேசம் செய்த சம்பு (ஈசன்), பிறையைக் கட்டி வைத்துள்ளான் சடையில்! தும்பைப் பூ போல் உள்ள வெண்சடையில், அதுவும் வெளீர் என்றே ஒளிர்கிறது! அந்தச் சிவபெருமான் மனம் மகிழ, அவனை ஒரு பக்கம் இடித்துக் கொண்டு இருக்கிறாய் = அப்பா பிள்ளையாய்! மலைமகள், எங்கள் உமையன்னையை இன்னொரு புறம் இடித்துக் கொண்டு இருக்கிறாய் = அம்மா பிள்ளையாய்! இப்படி நடு நின்ற நடுவே! வடிவே! வடி வேலவா!
பவனி வரவே உகந்து, மயிலின் மிசையே திகழ்ந்து படி அதிரவே நடந்த ...... கழல்வீரா பரமபதம் ஆய செந்தில், முருகன் எனவே உகந்து பழநிமலை மேல் அமர்ந்த ...... பெருமாளே!
பவனி வர ஆசைப்படும் முருகனே! அதற்காகவே மயிலின் மீது திகழ்கிறாயோ? வேகமாகப் பறக்காது, தாவும், அதனால் மெல்ல பவனி வரலாம் என்று தானோ?
மயில் தாவும் போது, வேண்டுமென்றே காலைத் தரையில் ஊன்றுகிறாயே! அதனால் காலில் உள்ள வீரக் கழல் சல் சல் சல் என்று பழநி மலைப் படிகளின் மீது அதிருகிறதே முருகா! கொஞ்சம் அடங்குடா! இம்புட்டுச் சத்தம் போடாதே! அடியார்கள் நாங்கள் மலைப்படிகளில் நடந்து செல்கிறோம் அல்லவா?
ஹேய் முருகா! பரமபதம் தான் என் பிறந்தவீடு! ஊருக்கே அங்கு தான் மோட்சம்! ஆனால் உன்னை நான் கைப்பிடித்தேன்! = என் முருகன் எனவே உகந்தேன்! செந்திலே என் புகுந்தவீடு! அதனால் உன் செந்திலே என் பரமபதம்! பரம பதம் ஆய செந்தில்... ஐயா, பழனி மேல் "அமர்ந்த" பெருமாளே! பழனிமலை மேல் "நின்று" இருக்கும் உன்னை, "அமர்ந்த" முருகா என்கிறாரே அருணகிரி! உனக்குப் புரிகிறதா?
கீழ்வானம் சிவக்கும்-ன்னு ஒரு படம் வந்துச்சி! சிவாஜி-சாவித்திரி மாதிரி, சிவாஜி-சரிதா காம்பினேஷன்-ன்னு வச்சிக்குங்களேன்! ரெண்டு பேரும் மாமனார்-மருமகளா போட்டி போட்டுக்கிட்டு நடிச்சி இருப்பாங்க! நாங்க எல்லாரும் சென்னைக்கு வந்த போது...புரசைவாக்கம், Roxy தியேட்டரில் (இப்போ இந்த தியேட்டரே இல்ல, அடுக்கு மாடி சரவணா ஸ்டோர்ஸ் ஆகி விட்டது வேறு விஷயம்)... ஒரே மாசத்தில் நாலைஞ்சு பழைய படங்களை எல்லாம் ஓட்டினாங்க! சிவாஜி ஹிட் படங்கள்! அதுல இதுவும் ஒன்னு! எப்படி ஞாபகம் இருக்கு-ன்னா...
1. சென்னையில், நாங்க எல்லாரும் சேர்ந்து பார்த்த முதல் படம் இது! 2. தியேட்டருக்கு கீழேயே, White Field Bakery! சின்னப் பையன் எனக்கு, அந்த கேக் வாசனையும், பட்டர் பிஸ்கட் வாசனையும்...ஆஆ... 3. இந்தப் படத்தில் வரும் - "முருகா முருகா முருகா" பாட்டு!
இந்தப் பாட்டில், ஒரு வீட்டுத் தோட்டத்தின் நடுவே முருகன் சிலை இருக்கும்! அங்கே நின்னுக்கிட்டு, சிவாஜியும் சரிதாவும், மாறி மாறிப் பாடுவாங்க! என்னமோ தெரியலை, அந்த முருகன் சிலை எனக்கு ரொம்ப பிடிச்சிப் போச்சி!
"அப்பா, மெட்ராஸ்-ல்ல வாடகை வீடு நல்லாவே இல்லை! ரொம்ப குறுகல்! நாம சொந்தமா வீடு கட்டிக்கிட்டுப் போனா, சின்ன தோட்டமாச்சும் வைக்கணும்! நடுல, இதே போல ஒரு முருகன் சிலை வைக்கணும்!"-ன்னு சொல்லிய ஞாபகம்...எனக்கே இருக்கு! :) படத்துக்கு வருவோம்! சிவாஜி, பெரிய மருத்துவர்! அவரு பையன் சரத்பாபு - மருமகள் சரிதா! ரொம்ப பாசமா இருப்பாங்க மாமனாரும் மருமகளும்! அப்போ....பார்வையற்ற ஜெய்சங்கர், கண் அறுவை சிகிச்சை செஞ்சிக்க, சிவாஜி கிட்ட வருவாரு! தன் தங்கையின் வாழ்வைக் கெடுத்தவனைக் கொலை பண்ணும் வெறியில் இருப்பாரு! அவர் கையில் இருக்கும் புகைப்படத்தைப் பார்த்த சிவாஜிக்கு செம ஷாக்!
தன் பையன் சரத்பாபுவைப் போட்டுத் தள்ளத் தான் ஜெய்சங்கர் வந்திருக்காரு-ன்னு தெரிஞ்ச பிறகும், சிகிச்சை செய்வாரு சிவாஜி! ஆனா Doctor vs Father உணர்ச்சிப் போராட்டத்தில் அப்பப்போ தவிப்பாரு! இதனால், சரிதா, சிவாஜி மேல சந்தேகப்பட்டு, வெறுப்பும் கோபமும் தானாவே வளர்த்துக்குவாங்க! ஆனா தன் கணவன் தான் அதில் உள்ளான்-ன்னு தெரியாது!
தன் புருஷன் தான் இதுல Involved-ன்னே தெரியாம, சிவாஜியைத் தாறுமாறாகச் சரிதா பேச...கதை விறுவிறு-ன்னு போகும்!
சிவாஜியைப் பொய்யர், புரட்டர், மருத்துவத் துரோகி-ன்னு எல்லாம் பேசிய அந்தப் பாசமிகு மருமகள்...சான்சே இல்லை! சிவாஜிக்கு ஈடு குடுத்து நடிக்கவல்ல ஒரே பின்னாளைய கதாநாயகி = சரிதா! முதல் மரியாதை ராதா கூட அப்புறம் தான்! பாட்டைக் கேட்டுகிட்டே படிங்க!
முருகன் முன்னாடி... * குற்றம் சாட்டி ஒதுக்கும் ஒரு உள்ளமும், * குற்றவாளி "ஆக்கப்பட்டு" அழும் இன்னொரு உள்ளமும், மாறி மாறி மோதும் காட்சி!
சரிதா: கண் கண்ட தெய்வமே, கை வந்த செல்வமே, முருகா முருகா முருகா! என்னென்ன சொல்கின்றார், என்னென்ன செய்கின்றார்? சில உள்ளதுக்குள் கள்ளம் வைத்தது - உன் வேலையா? வேலய்யா இது உன் வேலையா?
சிவாஜி: கண் கண்ட தெய்வமே, கை வந்த செல்வமே முருகா முருகா முருகா முருகா முருகா முருகா
சரிதா: சுந்தர வேல்முருகா, துண்டுகள் இரண்டாக சூரனைக் கிழித்தாய் அன்றோ! - ஒரு தோகையைக் காலடியில், சேவலை கை அணைவில் காவலில் வைத்தாய் அன்றோ!
சிவாஜி: பிள்ளையைக் கொன்றுவிட்டு, பெரிய விருந்து வைத்தான் கள்ளமில் பரஞ் சோதியே - விருந்து எல்லாம் முடிந்த பின்னே, பிள்ளையினை அழைத்தான் இறைவன் அருள்ஜோதியே!
சரிதா: காரிருள் சூழ்ந்ததும் கதிரும் மறைந்தது - நீதி எல்லாம் துடிக்கும்! சிவாஜி: மேற்கினில் சூரியன் மறைந்தாலும் - கீழ் வானம் சிவக்கும்! சரிதா: கந்தன் இருப்பது உண்மை என்றால் இது உண்மைகள் வெளியாகும்! சிவாஜி:காலம் வரும் வரை காத்திருந்தால் அது நல்லவர் வழியாகும்!!
இருவரும்: கண் கண்ட தெய்வமே! கை வந்த செல்வமே! முருகா முருகா முருகா! முருகா முருகா முருகா! சில உள்ளதுக்குள் கள்ளம் வைத்தது - உன் வேலையா? வேலய்யா இது உன் வேலையா?-ன்னு அது கேட்க... சில உள்ளதுக்குள் உள்ளம் வைத்தது - உன் வேலையா? வேலய்யா இது உன் வேலையா?-ன்னு இது கேட்க... பாவம், என் முருகன் என்ன தான் பண்ணுவான்? ரெண்டு பேருமே முருகனைத் தான் துணைக்கு கூப்பிடறாங்க! யாரை-ன்னு அவன் பாக்குறது?எப்படிப் பாக்குறது?
* அவன் அர்ச்சனையைப் பார்ப்பதில்லை! = லட்சார்ச்சனை, லட்சம் பேர் செய்யறாங்க....ஒரு டிக்கெட் ரூ200.00 தான்! பிரசாத டின் கிடைக்காட்டி குடுமிப்பிடிச் சண்டை தான்! :) * அவன் ஆட்களைப் பார்ப்பதில்லை! அவனோட பேரை, நிறைய வாட்டி ஒருவர் சொல்வதாலேயே அவர்களைப் பார்ப்பதும் இல்லை! = சரவணபவன் அண்ணாச்சி சொல்லாத முருகன் பேரா? :)
பின்பு எதைப் பார்க்கிறான் முருகன்?
சில உள்ளதுக்குள் கள்ளம் வைத்தது உன் வேலையா? வேலய்யா இது உன் வேலையா? என்று ஒரு உள்ளம் குற்றம் சாட்டும் போது... தன்னையும், தன்-மானத்தையும், தன் மகிழ்வையும்...அன்புக்காகவே இழக்கத் துணிந்த அந்த அன்பு...அன்பிற்கும் உண்டோ அடைக்கும் தாழ்! = அந்த உருக அன்பு, முருக அன்பு ஒன்றினையே, முருகன் பார்க்கிறான்! போதும் நீ பட்டது; வா என்னிடம் என்று வாரி அணைத்துக் கொள்கிறான்!
பெரு காதல் உற்ற தமியேனை நித்தல் பிரியாதே! பட்சம் மறவாதே! கை வந்த செல்வமே! என் - முருகா முருகா முருகா!
முருகனருள்-200 நிறைந்த நல்வேளையில், நல்லவர் பாடும் நல்ல பாடல் ஒன்றை இன்னிக்கி கேட்போமா? இவருடைய பாடலில் நிறைவு உண்டு! ஆனால் இவருடைய வாழ்வில்? - முருகா, என் கண்ணே...ஏன் இவளை இப்படிச் செய்து விட்டாய்? இவள்??? பலரும் அறிந்த பெயர் கே.பி.சுந்தராம்பாள் என்னும் KBS! இன்று சினிமாவில் ஒரு சில நகைச்சுவை நடிகர்கள், அம்மையாரின் குரலை, "ஞானப் பழத்தைப் பிழிந்து" என்றெல்லாம் கேலி பேசினாலும், ஆதவனை அற்பத்தனம் கேலி பேசி மாளுமா? சுந்தராம்பாளின் குரலுக்கு விலை கொடுத்து, இவர்கள் கட்டுப்படி ஆவார்களா? 1935-இல், இளம் வயதில், இவர் பெற்ற ஊதியம் ஒரு லட்ச ரூபாய்! அப்போ, தங்கம் - ஒரு சவரன் 13 ரூபாய்! = கிட்டத்தட்ட 7700 சவரன்! :)
KBS வெறுமனே பக்திப் பாடகர் மட்டும் தானா? விடுதலைப் போராட்ட வீரர் அல்லவா! தமிழிசை இயக்கத்துக்கு குரல் கொடுக்க, பலரும் தயங்கிய நேரத்தில், எம்.எஸ். சுப்புலட்சுமியும், கே.பி. சுந்தராம்பாளும் அல்லவா முதன் முதலில் ஓடி வந்தார்கள்!
சுந்தராம்பாள் வாழ்வை இன்று லேசாக எட்டிப் பார்ப்போம் வாருங்கள், முருகனருள்-200 வழியாக! அப்படியே கலைஞர் கருணாநிதியின் பேச்சுக்கு உடன்பட மறுத்த கதையும், பார்க்கலாம்......கடைசியாக :)
Kodumudi. Balambal-இன் மகள் Sundarambal (KBS) MS Subbulakshmi போலவே, இவருக்கும் அம்மாவின் இனிஷியல் மட்டுமே!
சிறு வயதிலேயே நாடக மேடைக்கு வந்தாகி விட்டது! நாடகம் என்றாலும், அது இசையுடன் கலந்தது தானே! ஆங்கிலத்தில் Musical-ன்னா மட்டும் நமக்கு Classics-ன்னு மரியாதை வரும்! :) ஆண் வேடம் (ராஜ பார்ட்), பெண் வேடம் (ஸ்தீரி பார்ட்) என்று கலவையாக நடித்துப் புகழ் பெறத் துவங்கி விட்டார் சுந்தராம்பாள்! அரிச்சந்திரா, பவளக்கொடி, ஸ்ரீ வள்ளி என்று நாடகப் புகழ்...விதியோ இலங்கைக்கு வா வா என்றது! எஸ்.ஜி. கிட்டப்பா - பெரும் புகழ் பெற்ற இன்னொரு மேடை நாடகக் கலைஞர்; இசை அறிஞர்! = Sencottah Gangadhara Iyer Kittappa = SG கிட்டப்பா! பெற்றோர் வைத்த பெயர் இராமகிருஷ்ண ஐயர்! ஆனால் செல்லமாக கிட்டன், கிட்டன் என்றே அழைக்க, அதுவே கிட்டப்பா ஆனது! கேரள-தமிழக எல்லை அல்லவா!
கிட்டப்பாவின் நாடகத்துக்கு, முன்னணி கர்நாடக இசைக் கலைஞர்களே முன் வரிசையில் வந்து கேட்பார்கள்! நாடகம் பார்க்க அல்ல! அவர் குரலைக் கேட்க! அப்படி ஒரு குரல் வளம்! இவரையும் இலங்கைக்கு நாடகம் போட அழைத்தனர்!
"இலங்கை முழுக்க இப்போ சுந்தராம்பாளின் கொடி பறக்கிறது! அங்கே போய் சிக்கிக் கொள்ள வேண்டாம்" என்று ஒரு சிலர் கிட்டப்பாவை எச்சரித்தனர்! "கிட்டப்பாவிற்கு எதிரே உன்னால் நிற்க முடியுமா?" என்று வேறு சிலரோ, சுந்தராம்பாளை பயமுறுத்தினர்! இப்படி சுந்தராம்பாள்-கிட்டப்பா சந்திப்பே மோதலில் தான்! :)
ஒரே மேடையில் இருவருமே கலக்கினர்! வள்ளித் திருமணம், இலங்கை முழுக்க ஒரே பேச்சு! மோதல் நட்பாய் மலர, அதே நாடகத்தைத் தமிழ்நாடு வந்தும் பலமுறை அரங்கேற்றம்! அவரவர் பாடலுக்கு, அவரவர் விசிறிகள்! இசைத்தட்டு விற்பனை!
ஆனால்...ஆனால்...ஆனால், இதயத்தின் எங்கோ ஒரு மூலையில்... காதல்...காதல்....காதல்! கலையுலகில் மட்டுமின்றி....வாழ்க்கையிலும் இணைந்து வாழ முடியுமா? ஆனால் கிட்டப்பாவோ ஏற்கனவே திருமணம் ஆனவர்! திருநெல்வேலி விசுவநாத ஐயரின் மகள் கிட்டம்மாளை முன்பே மணந்து இருந்தார்! ஆனால் இலங்கையில் விளையாடியது விதி!
முறையெல்லாம் பார்த்துக் கொண்டு இந்தக் காதல் மலரவில்லையே! மோதல் நட்பாய் மாறி, அதுவே காதல் ஆகிப் போனது யார் குற்றமோ? உள்ளத்தில் ஊறி விட்ட காதலை, இப்போ எதைக் கொண்டு அழிப்பது? அதன் கதி, அதோ கதி! முருகா...அதோ கதி!= கதியாய் விதியாய் வருவாய் குகனே!
கிட்டப்பா ஏற்கனவே திருமணம் ஆனவர் என்பது சுந்தராம்பாளுக்குத் தெரியும்! என்ன செய்ய? இன்றைய சினிமா போல் பணம் கொடுத்து, சொத்து கொடுத்து, குடும்பத்தைத் துரத்தி விடலாமா? :) சுந்தராம்பாளுக்கு இல்லாத பணமா? புகழா? அந்தஸ்தா?
சுந்தராம்பாள் ஒரு பேதை! அதிகம் உரிமை எடுத்துக் கொள்ளத் தெரியவில்லை! இயல்பிலேயே முருக பக்தி! விட்டுக் கொடுக்கும் போக்கு! ஆனாலும் எதற்கும் தளராத மனக்கோட்டை மட்டும் மலைக்கோட்டையாக இருக்கு!
காதலே வென்றது! "உன்னை இறுதிவரை காப்பாற்றுவேன்" என்று கிட்டப்பா வாக்கு அளித்தார்!
பின்னாளில், சுந்தராம்பாள் இது பற்றித் தானே வாய் திறந்து சொன்னது: "அம்மி மிதித்தோ அருந்ததி பார்த்தோ எங்கள் திருமணம் நடக்கவில்லை! அது பதிவுத் திருமணமும் அல்ல! அது ஈசனருளால் நடந்த திருமணம்! ஜன்மாந்திரத் தொடர்பு என்பார்களே அவ்வாறு நடந்த திருமணம்!"
முருகனாக சுந்தராம்பாள், (ராஜபார்ட்). நாடக மேடையில்!
பிறகு, பல நாடகங்கள், பல நாடுகள் என்று இந்த வெற்றிக் கூட்டணி சென்று வந்தது! நாடக மேடைக்கு வெளியே தான் கணவனும் மனைவியும்! மேடை ஏறிவிட்டால் கடுமையாக மோதிக் கொள்வார்கள்! தொழில் ரீதியான கேலியும் கிண்டலும் தூள் பறக்கும்! :))
விதி தன் பிடியை இன்னும் இறுக்கியதோ என்னவோ, வந்தது வினை, கண்ணன் வடிவில்! = பாலாழி பாய்ந்த பாதகனோ? :( கிருஷ்ண லீலா என்னும் நாடகம்! என்னமோ தெரியலை, அதைப் பார்க்கப் போக வேண்டாம் என கிட்டப்பா கூறினார்!
ஆனால் முருகனைப் போலவே கண்ணன் மேலும் அன்பு கொண்டிருந்த சுந்தராம்பாள், அந்த நாடகத்தைக் காணச் செல்ல.... அல்ப விஷயத்துக்காக கோபித்துக் கொண்டு, விட்டுவிட்டு பாதியிலேயே சென்று விட்டார் கிட்டப்பா! பத்திரிகைகள் கண்ணும் காதும் மூக்கும் ஒட்டி ஒட்டி எழுதின!
கருத்து வேற்றுமை! இடைவெளி அதிகமாயிற்று! = "உன்னை இறுதிவரை காப்பாற்றுவேன்" என்ற சத்தியம்??? :(
பிறகு, சுந்தராம்பாள் அவருக்கு எத்தனையோ கடிதங்கள் எழுதினார்! ஒவ்வொன்றிலும்......காதலும், கோபமும், தாபமும், இயலாமையும், மாறா அன்பும், இன்னும் என்னென்னமோ...கடிதத்தின் முடிப்பு மட்டும்...தங்கள் அன்பையே ஆபரணமாகக் கொண்ட அடியாள், சுந்தராம்பாள்!
கிட்டப்பா, தேசிய இயக்கத்தில் சேர்ந்து கதர் உடுத்த, அதையே சுந்தராம்பாளும் பற்றிக் கொண்டார்! பல தேசபக்தி நாடகங்களில் நடித்தார் சுந்தராம்பாள்! வெளியில் அதிகம் காட்டிக் கொள்ள வில்லையென்றாலும், சதா சர்வ காலமும், மனத்தால் அவரையே தாங்கி வாழ்ந்தாள் இந்த முருக பக்தை!
கிட்டப்பா வாழ்விலும் விதி விளையாடியது! 27 வயதிலேயே கடுமையான வயிற்றுவலி! குடல் வெந்து ஈரல் சுருங்கி.....1933-இல் அகால மரணம் எய்தினார்! :( சேதி கேட்டுத் துடித்த அந்த முருக பக்தை, என்னென்ன எண்ணி இருப்பாளோ? எப்டியெல்லாம் கசிந்து இருப்பாளோ? முருகா - இது உனக்குத் தகுமா?
அன்று பூண்டாள் துறவுக் கோலம்! 25 வயது தான்! காதல்-கணவருடன் அதிகம் வாழவில்லை தான்! ஆனாலும் உடம்பில் வெள்ளாடை! நெற்றியில் வெண்ணீறு! கழுத்தில் துளசி மாலை!! - கண்ணா, பாவீ, தகுமா? :( பால், இனிப்பு என்று எந்தப் போகப் பொருளும் உண்பதில்லை! மேடையில் ஆண்களுடன் ஜோடியாய் நடிப்பதில்லை! மேடையிலும் தனிமை! வாழ்விலும் தனிமை! சுந்தரம் சுந்தரம் என்றே அழைப்பார் போலும் அம்மையாரை! அந்தச் சுந்தர நினைவுகளே வாழ்வாகிப் போனது சுந்தராம்பாளுக்கு! இப்படி ஒடிந்து கிடந்தவரை இழுக்க, நந்தனார் சரித்திரம் என்னும் சினிமா வந்தது! அம்மையாரை நந்தனாராக நடிக்க வைக்க, தயாரிப்பாளர் ஆசான்தாஸ் தவமாய்த் தவம் இருந்தார்! காங்கிரஸ் தலைவர் தீரர் சத்தியமூர்த்தி வேறு எவ்வளவோ எடுத்துச் சொல்லியும்.............ஊகூம்!
அவரிடம் சாக்கு போக்கு சொல்லி, தன் ஊதியம் ரொம்ப அதிகம்...ரூபாய் ஒரு லட்சம் என்று பேச்சுக்குச் சொல்ல, ஆகா...அதற்கும் கட்டுப்பட்டார் தயாரிப்பாளர்! அம்மையாரின் மனமே இளகிப் போனது! யாருக்கும் ஜோடியாய் நடிக்க மாட்டேன் என்ற பல நிபந்தனைகளோடு, நந்தனாராக ஆண் வேடம் கட்டி நடிக்க ஒப்புக் கொண்டார்!
பின்பு, வரிசையாகப் படங்கள்! மணிமேகலை, ஒளவையார், பூம்புகார், திருவிளையாடல், கந்தன் கருணை, துணைவன், காரைக்கால் அம்மையார், கடைசியாக திருமலைத் தெய்வம்! ஏழுமலை இருக்க நமக்கென்ன மனக்கவலை?-ன்னு மனக் கவலையோடவே பாடிய அந்தப் பேதை உள்ளம்.....புற்று நோயால் 1980-இல் அணைந்து போனது!
முருக நீழலில்.....சுந்தராம்பாள்.....நீங்காது நிறைந்தேலோர் எம்பாவாய்! தலைப்பு பற்றி ஒன்னுமே சொல்லலையே-ன்னு நீங்கள் கேட்பது புரிகிறது! :) கலைஞர் கருணாநிதி திரைக்கதை-வசனம் எழுதிய படம் பூம்புகார்! கண்ணகியின் கதை! வாழ்க்கை என்னும் ஓடம்-ன்னு சுந்தராம்பாள் பாடுவதைப் பார்த்து இருப்பீங்களே! யாரிடமாவது சிடி இருந்தால், பாடலைத் தயவு செய்து Youtube-இல் Upload செய்யுங்களேன்!
இந்தப் படத்தில், கவுந்தி அடிகளாக நடிக்க, கே.பி சுந்தராம்பாள் தான் சரியானவர் என்பது கலைஞரின் எண்ணம்! கண்ணகி-கோவலனுக்கு வழித்துணையாக வரும் சமணப் பெண் துறவி = கவுந்தி அடிகள்!
இளங்கோவடிகளின் கதையையே, தனக்கு ஏற்றவாறு, அங்கொன்றும் இங்கொன்றுமாய் மாற்றிக் கொண்ட கலைஞர், சுந்தராம்பாளை நடிக்க வைக்க மட்டும் பெரும்பாடு பட்டார்! :)
என்ன தான் அப்போதைய முன்னணி வசனகர்த்தா, கலைஞர் வசனத்தில் நடிப்பதே பெரிய பெருமை என்று பேசப்பட்டாலும், அதெல்லாம் யாருக்கு? யாசிப்பவன் இருந்தால் தானே, கொடுப்பவனுக்குப் பெருமை! இங்கே சுந்தராம்பாள் தான் யாசிக்கும் நிலைமையிலேயே இல்லையே! பழுத்த முருக பக்தை! "சமணத் துறவியாக எப்படி நடிப்பேன்? மேலும் தான் பாடுவதோ விடுதலை இயக்க மேடை...எப்படி பகுத்தறிவுப் பாசறையில்...அதுவும் கருணாநிதியின் வசனத்தில்?" இப்படியெல்லாம் சுந்தராம்பாள் கருத, கலைஞரோ, கட்சிக்காக அல்ல, பகுத்தறிவுக்காக அல்ல ...தமிழுக்காக என்று சொல்ல....அம்மையாரும் தமிழுக்காகவே ஒப்புக் கொண்டார்! ஆனால், பல நிபந்தனைகளோடு! சுந்தராம்பாளைப் பிற்பாடு சரி செய்து கொள்ளலாம் என்பது கலைஞரின் கணக்கு! ஆனால் வந்தது வேறு வினை - கருணாநிதிக்கு?
காதல்-கணவர் மறைந்த பின், நெற்றியில் பூசிக் கொள்ளும் திருநீற்றை, மேக்-அப்புக்காகக் கூட அழிக்க மாட்டேன் என்று அம்மையார் உறுதியாக நிற்க... கருணாநிதியோ, "அம்மா, கவுந்தியடிகள் என்பவர் சமணர், இது பாத்திரத்துக்கு ஒட்டாதே" என்று கெஞ்ச......
கற்பனை செய்து பாருங்கள்....கலைஞர் மு கருணாநிதி அவர்கள் கெஞ்சுவதை...வெற்றிகரமான வசனகர்த்தா, ஒரு சீனில் வந்து போகும் பெண்மணியிடம்...இத்தனை விண்ணப்பம்! :)
பின்னர், செட்டில் வேறு ஒருவர் கொடுத்த யோசனையின் பேரில்... பட்டையாக விபூதி போட்டுக் கொள்ளாமல்....... திருநீற்றையே மெல்லீசா, ஒத்தையாக....நாமம் போல் போட்டுக் கொண்டு.... அப்படியே நடித்தும் பாடியும் கொடுத்தார் சுந்தராம்பாள்! இன்றும் சினிமாவில் கவுந்தி அடிகளைப் பார்த்தால், ஒற்றை நாமம் தரித்தது போலவே இருக்கும்!
இதோடு முடியவில்லை கலைஞரின் கணக்குகள்.... அன்று கொல்லும் அரசின் ஆணை வென்று விட்டது, நின்று கொல்லும் தெய்வம் எங்கே சென்று விட்டது?- என்று சிலப்பதிகாரத்தில் கூடப் "பகுத்தறிவு"ப் பாணியில் கேலியாக எழுத... இறைவனைக் கேலி செய்யும் வரியைப் பாட மாட்டேன் என்று மறுத்து விட்டார் சுந்தராம்பாள்!
இறைவனை, "இல்லை" என்று மறுதலிக்கவே மாட்டேன் என்று அம்மையார் சொல்லிவிட... வேறு வழியில்லாமல் கலைஞரும் - நின்று கொல்லும் தெய்வம் இங்கே வந்து விட்டது! என்று பாட்டையே மாற்றிக் கொடுத்தார்:)) இது தான், கலைஞரையே மடக்கிய கேபி சுந்தராம்பாள் நினைவலைகள்!
அவர் தாம் மாசில்லாக் காதலோடு, முருகன் திருவடியில், சுந்தராம்பாள் என்றும் அமைதி கொள்ளட்டும்! தமிழ் இசையோடு நிலைத்து நிற்கட்டும்!! இதோ, சுந்தராம்பாள் பாடும் மிக அழகான பாடல் ஒன்னு! கேட்டுக் கொண்டே பாட்டை வாசியுங்கள்! முருகனருள் = பாடல்கள் வலைப்பூ! கட்டுரை வலைப்பூ அல்ல! :)
படம்: கந்தன் கருணை வரிகள்: ஒளவையார் (இது இலக்கிய நூல்களில் இல்லை! ஒளவை தனிப் பாடல் திரட்டு) குரல்: கே.பி.சுந்தராம்பாள் இசை: கே.வி.மகாதேவன்
ஒளவையே, உலகில் அரியது என்ன?
அரியது கேட்கின் வரிவடி வேலோய் அரிது அரிது மானிடர் ஆதல் அரிது! மானிடராயினும்....கூன் குருடு செவிடு பேடு நீங்கிப் பிறத்தல் அரிது! கூன் குருடு செவிடு பேடு நீங்கி பிறந்த காலையும்...ஞானமும் கல்வியும் நயத்தல் அறிது! ஞானமும் கல்வியும் நயந்த காலையும்...தானமும் தவமும் தான் செய்தல் அறிது! தானமும் தவமும் தான் செய்தலாயினும்...வானவர் நாடு வழி திறந்திடுமே!
கொடியது என்ன?
கொடியது கேட்கின் வரிவடி வேலோய் கொடிது கொடிது வறுமை கொடிது அதனினும் கொடிது; இளமையில் வறுமை அதனினும் கொடிது; ஆற்றொணாக் கொடு நோய் அதனினும் கொடிது; அன்பு இல்லாப் பெண்டிர் அதனினும் கொடிது; அவர் கையால் இன்புற உண்பது தானே!
என்றும் புதியது பாடல் - என்றும் புதியது பொருள் நிறைந்த - பாடல் என்றும் புதியது முருகா உனைப் பாடும் - பொருள் நிறைந்த பாடல் என்றும் புதியது
அருள் நிறைந்த புலவர் நெஞ்சில் அமுதம் என்னும் தமிழ் கொடுத்த பொருள் நிறைந்த பாடல் என்றும் புதியது...
முருகன் என்ற - பெயரில் வந்த - அழகே என்றும் புதியது முறுவல் காட்டும் - குமரன் கொண்ட - இளமை என்றும் புதியது
உனைப்பெற்ற அன்னையர்க்கு உனது லீலை புதியது உனது தந்தை இறைவனுக்கோ வேலும் மயிலும் புதியது முருகா உனைப் பாடும் பொருள் நிறைந்த பாடல் என்றும் புதியது
திங்களுக்கும் ஞாயிறுக்கும் கந்தன் மேனி புதியது சேர்ந்தவர்க்கு வழங்கும் கந்தன் கருணை புதியது அறிவில் அரியது...அருளில் பெரியது அள்ளி அள்ளி உண்ண உண்ண உனது தமிழ் இனியது
முதலில் முடிவு அது முடிவில் முதல் அது மூன்று காலம் உணர்ந்த பேர்க்கு ஆறுமுகம் புதியது! நாளும்.......மாசில்லாக் காதலையும், முருகத் தமிழையும், தமிழ் இசையையும் போற்றிய சுந்தராம்பாள் திருவடிகளே சரணம்!
