இந்த நாளில், முருகனருளில் ஒரு அஞ்சலி! ஊனங்கள் பல இருந்தும், வானங்கள் தொட முடியும் என்பதற்கும்... எவ்வளவு தோண்டினாலும், தன்னம்பிக்கை சுரக்கச் சுரக்க, சுரக்கும் என்பதற்கும்... என் கண் முன்னே எடுத்துக்காட்டாய் நின்றவர்... அந்தோணி முத்து அண்ணா!
இளம் வயதில், அவர் மறைந்த செய்தி, என்னை மிகுந்த அதிர்ச்சிக்கு உள்ளாக்கியது!
இப்பத் தான், நானும் மதுமிதா அக்காவும், சென்னை புழலேரியில், இவர் வீட்டிற்குச் சென்று பார்த்தாப் போல இருக்கு! இளையாராஜா இசையில் உச்சி வகிடு எடுத்து-ன்னு பாடக் கேட்டாப் போல இருக்கு!
காலன்றி, மேல்கொண்டு, தவழ்ந்து தவழ்ந்தே அவர் எங்களை உபசரித்த விதம்... இல்லத்துக்கு வருவோரை முகத்தாலேயே எப்படி மனங்குளிர வரவேற்கலாம் என்பதை நண்பர்களை விட இவரிடத்தில் தான் தெரிந்து கொண்டேன்!
என்னவொரு முனைப்பு, தன்னார்வம், சுய சம்பாத்தியம், பொது முனைப்பு! தெய்வத்தால் ஆகாது எனினும் முயற்சிதன் மெய்வருத்தக் கூலி தரும்! - இந்தக் குறளுக்கு உரை = அந்தோணிமுத்துவின் வாழ்வு!
இதோ, அந்தோணி அண்ணன் பற்றிய இசை இன்பப் பதிவு! அவருக்குப் பிடிச்ச சிவரஞ்சனி பாட்டு பத்தி அவரே எழுதின பதிவு இங்கே!
ஊரெல்லாம் ஓரோர் பேர் சொல்லி என்னை அழைக்க...நீங்கள் மட்டும் "விஷ்ணு" என்று எதற்கு அழைத்தீரோ? அறியேன்! ஆனால் இதோ உங்கள் "விஷ்ணுவின்" துதிகள்! - பிதாவே, இவர் மனத்தை சொஸ்தம் பண்ணி ஆற்றும்! இணையடி நீழலில் ஆற்றும்!
என் முருகா.....அந்தோணிமுத்து அண்ணாவின் ஆவி குடி இருக்க...ஆவி-நன்-குடி அருள்வாய் தானே? Father, into thy hands I commit my spirit!" - Luke 23:46 Mr. Antonimuthu passed away on August 23, 2010 at 10.00 a.m. due to stomach tumor and wheezing in Chennai. Funeral Mass offered at 11.00 a.m. on August 23, 2010, at Peria Nayagi Chapel in his native village, Peria Nayagi Nagar, Villupuram District 605702. ஆவி குடி இருக்க - ஆவினன் குடி! இதுவே இந்த வார முருகனருள் பாடல்! சீர்மிகு சீர்காழியின் குரலில்...இதோ
ஆவி குடியிருக்கும் ஆவினன்குடி - அங்கே கொலுவிருக்கும் அழகுத் திருவடி (என் ஆவி குடியிருக்கும்)
பாவங்களைப் போக்கும் பால் காவடி தேன் பஞ்சாமிருதம் இனிக்கும் குகன் சேவடி (என் ஆவி குடியிருக்கும்)
சேவல் எழுந்தாடும் வெற்றிக்கொடி சேந்தன் திருப்பாதம் பற்றிப்பிடி வேல் வந்து வரவேற்கும் வா இப்படி கேளாய் நீ நெஞ்சே என் சொல் படி (என் ஆவி குடியிருக்கும்)
நீல மயில் ஆடும் கோயில் படி நித்த நித்தம் காணும் நிலை எப்படி காலம் எல்லாம் நினைந்து கண்ணீர் வடி வாழ்வு தரும் முருகன் வண்ணப்பொற் கழலடி (என் ஆவி குடியிருக்கும்)
குழந்தை பிறக்கலையே என்ற கவலை ஒரு சிலரை வாட்டினால், குழந்தை பிறந்தும்......ஒரு சிலரைக் கவலை தொத்திக் கொள்ளும்! ஒரு ஜீவன் உலகை எட்டிப் பார்ப்பதை வைத்துத் தான், எத்தனை எத்தனை இன்ப உணர்ச்சிகள், துன்ப உணர்ச்சிகள்! ஒருத்தி மகனாய்ப் பிறந்து, ஓர் இரவில், ஒருத்தி மகனாய் ஒளிந்து வளர..."நான்" என்றே இருந்த மனிதன், "நாம்" என்று திசை மாறுகிறான்! :)
தாமிரபரணிக் கரை ஊரான ஸ்ரீவைகுண்டம் என்னும் அழகிய தலத்தில் ஒரு சைவ வேளாளக் குடும்பம்! சண்முக சிகாமணிக் கவிராயர்-சிவகாம சுந்திரி அம்மை! குடும்பமே தமிழ்ப் புலமையிலும் முருகனிலும் தான் நடந்து கொண்டிருந்தது! அந்த வீட்டின் அமைதியைக் கிழித்துக் கொண்டு ஒரு சத்தம்...குவா-குவா! குகா-குகா! குமரகுரு என்று பேரிட்டுக் கொஞ்சிக் கொஞ்சி வளர்த்த குழந்தைக்கு, பதி்லுக்குக் கொஞ்சத் தெரியவில்லை! "அம்மா, அப்பா" என்று அழைத்தால், அதைக் கேட்க, ஏங்கும் காது! ஆனால் "மா, பா" என்று அழைத்தாலே போதும், அதாவது நடக்காதா என்று ஏங்கியது மனம்! - குழந்தைக்குப் பேச்சு வரவில்லை!
அட, எல்லாக் குழந்தையும் முதல் ஆண்டிலேயே பேசி விடுகிறதா என்ன? அதன் போக்கில் விட்டுப் பார்ப்போம் பார்ப்போம் என்று பார்த்தது தான் மிச்சம்.....கேட்க ஒன்றும் மிச்சமே இல்லை! ஐந்து ஆண்டுகள் கழித்துத் தெரிந்தது...குழந்தை "ஊமை"!
இந்த "ஊமை" என்கிற சொல்லே பிடிக்கலை! அது என்ன "ஊமை ஊரைக் கெடுக்கும்" என்று பழமொழி? நல்லாவே இல்லை! வேறு ஏதாச்சும் நல்ல சொல் உள்ளதா?
பார்வையற்றோர், காது கேளாதோர் என்பது போல்...வாய் பேசாதோர் என்று அழைப்பது ஓரளவு மரியாதையாக இருக்கும்! விழிப்புலனர்கள், செவிப்புலனர்கள், வாய்ப்புலனர்கள் என்று அழைக்கலாமோ? Physically Handicapped-ஐ விட, Physically Challenged என்பது போல், இது பிடிச்சிருக்கு!
நடுங்கிப் போன குமரகுருவின் பெற்றோர் மருத்துவரை நாடினர்! பிறவிப் பலனாய் வாய்த்ததை பிற மருத்துவர் தீர்க்க முடியுமா? பிறவி மருத்துவன் அல்லவா தீர்க்க முடியும்! யார் அவன்? = என்னை...செந்தூர் முருகா சேர்த்துக் கொள்! மடியேறிய குழந்தையுடன் படியேறினாள்! முருகன் படியேறினாள்! காதலன் வீட்டுப் படி இல்லை என்று ஆனாலும், முருகன் வீட்டுப் படி இல்லை என்று ஒருநாளும் ஆகுமா?
அந்தச் செந்தூர் வீட்டுப் படியிலேயே படியாய்க் கிடந்தனர் பெற்றோர்! படியாய்க் கிடந்து, உன் பவளவாய் காண்பேனே என்பது ஆழ்வார் பாசுரம்! இங்கோ, படியாய்க் கிடந்து, மகன் பவளவாய் பேசக் காண்பேனே என்று ஆயிற்று பெத்த வயிறுப் பாசுரம்!
திருச்செந்தூர் தரையிலே வளர்த்தி விட்ட குழந்தை, முருகனருள் முன்னிற்க, வாய் அசைக்கத் தொடங்கியது! அலை அசைக்கும் திருச்செந்தூரில் வாய் அசைக்க, வந்து சேய் அசைக்க, கண்டு தாய் அசைக்க, தமிழ் அசைக்கத் தொடங்கியது! பூமேவு செங்கமலப் புத்தேளும் தேறரிய பாமேவு தெய்வப் பழமறையும் – தேமேவு நாதமும் நாதாந்த முடிவும் நவைதீர்ந்த போதமுங் காணாத போதமாய்... என்று கந்தர் கலி வெண்பா பிறக்கத் துவங்கிற்று! பிள்ளைக் கலி தீர வந்த குழந்தை, கந்தர் கலியைப் பாடத் துவங்கிற்று!
(புத்தேள் = இறைவன்; தேறு அரிய = தெளிய முடியாத; பழமறை = பழமையான மறைகள்; தேமேவு = இறைவனை சார்ந்த; நாதமும் = நாத தத்துவம்; நாதாந்தம் = விந்து தத்துவம் நவை = குற்றம்; போதமும் காணாத போதம் = அறிவால் அறிய முடியாத இறைவன்!)
சிறுவனுக்கு முன்பு வாய் மூடி இருந்தாலும், அவன் செவி மூடவில்லை போலும்! தந்தை சண்முக சிகாமணிக் கவிராயரின் தமிழை, வீட்டில் கேட்டுக் கேட்டே வளர்ந்த குழந்தை, இன்று பாட்டு பாட்டே என்று பாடத் துவங்கி....பையன் குமரகுரு, சில நாளில், குமரகுருபர சுவாமிகள் ஆனார்! துறவு கொள்ளும் முன், தன் குருவான தருமபுர ஆதீனத்தின் சொற்படி, பல தலங்களுக்குச் சென்ற குமரகுருபரர்... * மதுரையில் மீனாட்சி அம்மை பிள்ளைத்தமிழ் பாடினார்! * வைத்தீஸ்வரன் கோயிலில் முத்துக்குமாரசாமி பிள்ளைத் தமிழைப் பாடினார்! * தில்லையில் சிதம்பரக் கோவை பாடினார்! * பின்பு துறவு பூண்டு, காசிக்குச் சென்று, சகலகலாவல்லி மாலை பாடினார்! பிள்ளைத்தமிழ் நூல்களில் எல்லாம், இவரின் மீனாட்சியம்மை பிள்ளைத் தமிழே, இலக்கிய வளத்துக்காகப் பெரிதும் கொண்டாடப்படுகிறது!
தில்லையில், பல சைவ அன்பர்கள், இவரிடம் ஒரு வித்தியாசமான வேண்டுகோள் வைத்தனர்! தமிழில் உள்ள யாப்பருங்கலக் காரிகை என்னும் பிற்காலத் தமிழ் இலக்கண நூல்! அதில் சமணக் கருத்துக்கள் உள்ள உதாரணச் செய்யுள்கள் இடம் பெறுவதாக அவர்கள் கருதியதால், அதை மாற்றி, அந்நூலின் இலக்கணங்களுக்குச் சைவ விஷயமாகச் செய்யுள் அமைத்துத் தர வேண்டினார்கள்! குமரகுருபரர் முதலில் தயங்கினாலும், பின்னர் எழுதித் தந்தது தான் சிதம்பரச் செய்யுள் கோவை!
இவர் வாழ்வில், சிங்கத்தின் மேலேறிச் சென்று, டில்லி பாதுஷா ஒளரங்கசீப் மன்னரைச் சந்தித்ததாகவும், இந்துஸ்தானி மொழியிலேயே பேசி, அவரிடம் கொடைகள் பெற்று, காசியில் குமரகுரு மடம் அமைத்ததாகவும் சொல்லுவார்கள்!
ஆனால் இது வரலாற்றில் எவ்வளவு தூரம் நிற்கும் என்று தெரியவில்லை! ஆனானப்பட்ட ஒளரங்கசீப் சிவாலயத்துக்கு நன்கொடை அளித்தாரா? அவர் சிசியா (Jiziya) என்னும் மத வரியைப் போடாமல் விட்டாலே போதும் என்று இருந்த காலம்! அதனால், இப்படியான அதீத சமயப் புனைவுகள் தேவை இல்லை!
மேலும், திருமலை நாயக்கர் முன்னிலையில், மீனாட்சியம்மை பிள்ளைத்தமிழ் பாடியதாகவும் இன்னொரு குறிப்பு உண்டு! ஆனால் நாயக்கரோ 1659-லேயே மறைந்து விட்டார்! ஒளரங்கசீப் ஆட்சிக்கு வந்ததே அப்போது தான்! அப்படி இருக்க, அதற்கு முன்னரே நாயக்கர் முன்னிலையில் பாடி, உடனே காசி யாத்திரையும் சென்று, டில்லி பாதுஷாவைச் சந்தித்தார் என்பதும் ஒட்டாது!
எனவே, டில்லி பாதுஷா என்று குறிப்பிட்டாலும், அது தாரா ஷிகோ-வாக இருக்க வாய்ப்புண்டு! இவரே ஷாஜகானின் மூத்த வாரிசு! நல்ல சமயப் பொறையாளர்! இவரிடம் குமரகுருபரர் மான்யம் வாங்கி இருக்கலாம்! பின்னாளில், அண்ணன் தாரா ஷிகோ ஒரு முஸ்லீமே அல்ல என்று அறிவித்த ஒளரங்கசீப், தாராவை ஓட ஓட விரட்டி, காட்டிக் கொடுக்க வைத்து, கொன்றது எல்லாம் வரலாற்றுப் பிரசித்தம்!
எனவே, குமரகுருபரர் போன்ற நல்-அடியவர் கதைகளில், ஒட்டாமல் இருக்கும் விஷயங்களைத் திருத்தி எழுதுவது, நாளைய தலைமுறைக்கு நன்மையே பயக்கும்! இதை இன்றைய சமயப் பெரியவர்கள், எதிர்ப்பு என்று எண்ணாது, புரிந்து கொள்ள வேணும்! காசியில் இன்றும் குமரகுரு மடம் உள்ளது! அங்கே மடம் அமைத்துத் தங்கி, வடகாசியில் தென்மொழித் தொண்டாற்றி வந்தார் குமரகுரு!
இந்துஸ்தானி/இந்தியிலும் புலமை கொண்டவர் ஆதலால், அம்மொழிகளிலும் உபன்னியாசம் நிகழ்த்துவார்! அப்போது ஆற்றியது தான் கம்பராமாயணச் சொற்பொழிவு! = கேட்டவர் துளசிதாசர்! பிறந்தது துளசி ராமாயணம்!
வடமொழி ஆதிக்கம் மிகுந்த அந்தக் காலக் கட்டத்திலேயே, பெருமாள் கோயில்களில்... * தமிழ்ப் பாசுரங்கள் ஓதி முன்னே செல்ல, * தமிழை அந்த இறைவனே பின் தொடர, * அதற்குப் பின்னர் தான் வடமொழி வேதங்களையே ஓதி வந்தனர்! இந்தக் காட்சிகளைக் கண்ட குமரகுருபரர் மிகவும் லயித்துப் போய், இது போன்ற ஒரு நிலை, தில்லையில் வராதா, தமிழ் கடவுளான முருகன் கோயில்களில் தமிழ் என்று முன் செல்லுமோ என்று ஏங்கினார்! அப்போது அவர் வாய் விட்டுப் பாடியது தான் - "பச்சைத் தமிழின் பின் சென்ற பசுங் கொண்டலே!!"
காசியிலேயே குமரகுருபரர் நெடுநாள் வாழ்ந்து, தமிழ்த் தொண்டாற்றி, பின்னர் சிவனடியைச் சேர்ந்தார்! அன்னாரின் பிள்ளைத் தமிழ் = பிள்ளையின் மீதும், தாயின் மீதும்! * ஒன்று முத்துக்குமாரசாமி பிள்ளைத் தமிழ்! * இன்னொன்று மீனாட்சியம்மை பிள்ளைத் தமிழ்! இரண்டுமே தமிழ் இலக்கியத்தின் விலைமதிக்க முடியாத பெருஞ்சொத்து! அரசு குமரகுருபரர் நினைவாக வெளியிட்ட அஞ்சல் தலை இதோ! சரி, எதுக்கு இன்னிக்கி குமரகுருபரர் பற்றி மாதவிப் பந்தலில் பதிவு-ன்னு பாக்கறீங்களா? அவர் குருபூசை-நினைவு நாள் ஏதாச்சும்? இல்லை! கீழே Youtube காணொளியைப் பாருங்க! - தாய்ப்பால் கொடுத்தாள்! தமிழ்ப் பால் கொடுத்தான்!!
தாய்ப்பால் கொடுத்தாள் பராசக்தி - தனிக்கருணைத் தமிழ்ப் பால் கொடுத்தான் தமிழ் முருகன்! வாய்ப்பால் `நான்பாடும் பழந்தமிழில் - பாடத் தொடங்குகிறேன் ஆடும் மயில் வேலன் அருள்!!
தந்தைக்கு மந்திரத்தைச் சாற்றிப் பொருளுரைத்த முந்து தமிழ் சக்தி மகன் முருகன் வந்தான்! - பல் முளைக்கு முன்னே எனக்குக் கவிதை தந்தான்! கந்தன் வந்தான் கவிதை தந்தான்!!
ஆதிசக்தி நாயகியின் பாதிசக்தி ஆனவர்தம் நீலிக்கண்ணிலே பிறந்த முருகன் வந்தான் - கலை ஞானக்கண் திறந்து வைத்து தமிழும் தந்தான்! கந்தன் வந்தான் கவிதை தந்தான்!!
ஆங்கார சக்தி என்னும் ஓங்காரத் தாமரைக்குள் ரீங்காரம் செய்யும் வண்டு கந்தன் வந்தான்! என்றும் நீங்காத செந்தமிழில் கவிதை தந்தான்! கந்தன் வந்தான் கவிதை தந்தான்!!
வந்தகலி தீர்ந்ததென்று கந்தர்கலி பாட வந்தேன் சந்தமுள்ள நூறுகவிச் சரணம் தந்தேன்! அந்தக் கந்தனவன் தனது திருச்சரணம் தந்தான்! கந்தன் வந்தான் கவிதை தந்தான்!!
வரிகள்: கண்ணதாசன் குரல்: ராதா ஜெயலட்சுமி (ராதா ஜெயலட்சுமி பாடிய இதர திரைப்பட முருகன் பாடல்கள், இதோ! ; மனமே முருகனின் மயில் வாகனம் என்ற பாட்டு மிகவும் பிரபலமானது!) இசை: கே.வி. மகாதேவன் படம்: ஆதிபராசக்தி
இன்னிக்கு TMS குரலில், ஒரு வித்தியாசமான பாட்டை, கிட்டத்தட்ட கிறிஸ்துவ ட்யூன்-இல் இருக்கும் முருகன் பாட்டைக் கேட்போம்! :) ஓப்பனிங் பீஸ், ஒரு பழைய தமிழ்ப் பாட்டு - சிவாஜி படப் பாட்டு போலவே இல்ல? என்ன சினிமாப் பாட்டு-ன்னு கண்டுபிடிங்க பார்ப்போம்! :) முருகனைப் பார்த்தால் பசி தீருமா? பசி வருமா?? பார்த்தால் பசி தீரும் என்பார்கள்! ஆனால் எனக்கு, அவனைப் பார்க்கப் பார்க்க, பசி தான் இன்னும் அதிகமாகும்... :)
பின்னே? படையலில் வச்சிருக்கும் தேன், தினைமாவு, அப்பம், அதிரசம் - இதெல்லாம் பார்த்தால்? இதெல்லாம் கூட சமாளிச்சிறலாம்... ஆனால் அவன் இதழ்க் கோட்டோரம் அந்தச் செழும்-செவ்-இதழ்கள்...அதைப் பார்த்தால்...பசி அல்லவோ அதிகமாகிறது? :) பாட்டைக் கேட்டுக்கிட்டே படிங்க!
பன்னிரு விழி அழகை, முருகா பார்த்தால் பசி வருமா? - உன் பனிமொழி வாய்த் தமிழை, முருகா கேட்டால் துயர் வருமா? (பன்னிரு விழி அழகை)
கண் இரண்டு இருந்தென்ன - உன் கதிர்வேல் அழகைப் பாராமல்? கால் இரண்டு இருந்தென்ன - உன் குன்றத்தில் வந்து சேராமல்? (பன்னிரு விழி அழகை)
பொன் பொருள் எதற்காக - உன் புன்னகை இன்பம் இல்லாமல்? என்னுயிர் எதற்காக - உன் இணையடிப் போற்றிக் கொள்ளாமல்? (பன்னிரு விழி அழகை)
ஓசைகள் எதற்காக - ஓம் ஓம் என்றுஒரு தரம் பாடாமல்? ஆசைகள் எதற்காக - உன் அருள் பெறும் வழியை நாடாமல்? (பன்னிரு விழி அழகை)
முருகா ... முருகா ... முருகா ... முருகா ...
உன் அருள் பெறும் வழியை நாடாமல், ஆசைகள் எதற்காக? என்கிறாரே! ஆசை வேணும்-ங்கிறாரா? வேணாம்-ங்கிறாரா? ஆசையை ஒழி! ஆசையே துன்பத்துக்குக் காரணம்-ன்னுல்ல சொல்லுவாங்க?
அருள் பெறும் வழியை நாடாமால், கண்ட கண்ட ஆசை இருந்தால், அப்போது பயனில்லை! ஆனால் அவன் அருளை நாடி, அதையே முதல் முதல் ஆசையாய், தலையாய ஆசையாய் வைத்து விட்டால், மத்த ஆசை எல்லாம் இருந்தாலும், அதெல்லாம் நம்மை ஒன்னும் செய்யாது விட்டு விடும்! :)
அவன் திருமேனி மீது அதிக ஆசை வையுங்கள்! மற்ற ஆசைகள் எல்லாம் அதற்கு அப்புறம் தான் என்று வைத்து விடுங்கள்! அப்படி வைத்து விட்டால்..... முருக ஆசையே மேலோங்கி நிற்கும்! இதர பருக ஆசையெல்லாம் அதன் பின்னால் தான் நிற்கும்!
ஈழத்தில் இன்று பலவும் முடிந்து விட்ட கோலம்! ஆனால் இன்னும் முடியாது முகாம்களில் தவிக்கின்ற கோலமும் கூட! * முன்னது...கடந்த காலம் = உயிர் கடந்த காலம்! * பின்னது...நிகழ் காலம் = உயிர் நிகழும் காலம்!
இருக்கும் இந்த உயிர்களையும், கடந்த காலமாய் ஆக்கி விடாது... ஐ.நா-வின் அண்மைய ஈழ முயற்சிகள் பலன் அளிக்க வேணுமாய்... பரமனையும் முருகனையுமே வேண்டிடுவோம்!
முருகனுக்கு ஆறு வீடுகள் இருப்பது போல், முகாம்களில் இருப்பவர்களுக்கும் வீடுகள் உள்ளன அல்லவா? அவர்கள் எல்லாம், தம் ஒரு வீடு திரும்ப, ஆறு வீடு முருகன், மனம் வைத்தே ஆக வேண்டும்! மனம் வைத்தே ஆக வேண்டும்!!
வீடேறி வந்து நின்று, வேண்டியவர்களால் விரட்டப்பட்டால் அல்லவோ, வீட்டின் அருமை தெரியும்! அந்த அருமையைத் தெரிந்து கொள் என் முருகா!
இன்று முருகனருள் வலைப்பூவில்... ஏழாம் படை வீடு என்று சிலாகிக்கப்படும் கதிர்காமம்=ஈழத்து முருகன்!
ஈழத்து ஆலயங்கள்
ரமணி அம்மாள் பற்றியும், அவர் முருகன் பாடல்கள் பலவும் அவ்வப்போது முருகனருள் வலைப்பூவில் இட்டு வந்துள்ளேன்! * அம்மனுக்கு ஒரு பெண் பாடகர் = எல்.ஆர்.ஈஸ்வரி என்றால், * முருகனுக்கு ஒரு பெண் பாடகர் = ரமணி அம்மாள்! மரபு இசை நுணுக்கம் உள்ளவர்! அதே சமயம் மக்களோடு மக்களாக எளிமையாக, கும்மாளமாகப் பாடக் கூடியவர்! கே.பி.சுந்தராம்பாள் போலவே வெங்கலக் குரல் அம்மாளுக்கு! கூடவே நம்மையும் பாட வைப்பார்!
திரைப்படங்களிலும் எம்.எஸ்.வி/குன்னக்குடி இசையில் பாடியுள்ளார்! வேல் முருகா வேல் முருகா...வேல்ல்ல்ல்ல்ல்-ன்னு இவர் உச்ச கட்டத்தில் பாடும் போது, மைக் செட்டே அதிரும்! குன்றத்திலே குமரனுக்குக் கொண்டாட்டம் பாட்டைத் தெரியாதவங்க இருக்க முடியாது! அவ்வளவு சிறப்பு!
ரமணி அம்மாள் பாடிய ஈழம்-கதிர்காமப் பாடல் தான் இன்றைய பதிவு! கதிர்காமம், ஈழத்தின் தென் கிழக்குக் கோடியில் உள்ளது! எப்படி தமிழ்நாட்டில் திருச்செந்தூர் உள்ளதோ, அதே போல! ஆனால் கடலோரத்தில் இல்லை! கடலுக்குச் சற்று அருகே! தமிழ்ப் பகுதிகளின் தென் கிழக்கு மாகாணத்தின் வால் பகுதியில் கடைசியாக ஒட்டிக் கொண்டு இருக்கும் ஊர்! இதைச் சுற்றிலும் சிங்களப் பகுதிகள் தான் அதிகம்!
முருகன் என்று நாம் பரவலாகச் சொன்னாலும், மொத்தம் மூன்று மதங்கள் சங்கமிக்கும் "புதிரான-புனிதமான" இடம் தான் இந்தக் கதிர்காமம்! * தமிழ் = முருகன்! * பெளத்தம் = "கதிர"தேவோ என்னும் மக்கள் வீரன்; போதி சத்துவர்-மகா சேனா ஆகியோரின் காலடி பட்டதாகச் சொல்வோரும் உண்டு! * இஸ்லாம் = அல் கதிர் என்னும் இறைத் தூதர் மற்றும் வீரர் இஸ்கந்தர்; இருவரும் ஞான ஊற்றினைத் தேடிய இடம், அல் கதிருக்குத் தான் அகப்பட்டது என்பது வழக்கு; அதான் "கதிர்"காமம்!
இந்த மூன்று ஆலயங்களும் ஒன்று சேர்த்தே, "கதிர்காம தேவளே" என்று தற்போது அழைக்கப்படுகிறது! கதிர்காமத்தை ஒட்டி ஏழுமலைகள்! ஆனால் முருகன் மலை மீது இல்லை! முல்லைத் தெய்வமாக, காடும் காடு சார்ந்த இடத்தில் வசிக்கின்றான்! :)
குன்று இருக்கும் "இடம் எல்லாம்" குமரன் இருக்கும் இடம் என்று ஒரு நயத்துக்குச் சொன்னாலும்...இதோ...இந்தக் குறிஞ்சித் தெய்வம், கதிர்காமத்து முல்லைக் காட்டில்! அருகில் மாணிக்க கங்கை ஆறு பாய்கிறது! இயற்கை அழகு கொஞ்சும் இனிய தொட்டிலில் தான், நம் அழகன் முருகனும் இளைப்பாறுகிறான்! இந்த மூன்று மதங்களின் மக்கள் மட்டும் அல்லாமல், வேட்டா (வேட) என்ற பழங்குடி இனத்தவருக்கும் இதுவே கோயில்! இவர்களே இலங்கையின் ஆதி குடிகள்! வள்ளிமலை வேடர்கள்-வள்ளியின் கதை போலவே தான் இவர்களின் கதையும்! இவர்களின் முருகனின் பெயர் = "கந்தே யாகா"= மலைகளின் ஆவி! தங்கள் குலப் பெண்ணான வள்ளியின் புகுந்த வீடே இவர்களின் கதிர்காமம்!
மற்ற இந்து ஆலயங்களில் இருப்பது போல், கதிர்காமத்தில் முருகனுக்குக் கருவறைச் சிலை கிடையாது! வேல் வழிபாடும் கிடையாது! பின்னால் ஒரு எந்திரமும், முன்னால் ஒரு துணித் திரையும் தான் கருவறை! அந்தத் திரையில் உள்ள வள்ளி-முருகன்-தேவயானையே மூலவர்!
கருவறையில் உள்ள அறுகோண எந்திரம், கதிர்காமத் தேவரின் அரு-உருவமாகக் கருதப்படுகிறது! அதைப் பெளத்தர்கள், இஸ்லாமியர்கள், தமிழர்கள் மூவருமே வழிபடுகிறார்கள்! அவரவர் விழாக்களில் அது புறப்பாடும் கண்டருள்கிறது! பெளத்தர்களும் தங்கள் கிரி விஹாரத்தில் இதை எழுந்தருளப் பண்ணிப் பூசிக்கிறார்கள்!
முருகன் திரையில் இருக்க, திரைக்குப் பின்னுள்ள யந்திரத்துக்கு, ஒரு இஸ்லாமியர் பூசை செய்வதைக் கற்பனை செய்து பாருங்கள்! ஆகா! புத்த பிக்குகள் முருகனின் திரைச்சீலைக்கு முன்னால் அமர்ந்து பூசிப்பதையும் மனக் கண்ணால் பாருங்கள்! ஆகா! * "கதிர்காமத் தேவன்" யார்? தமிழ் முருகனா? பெளத்த தேவனா? இஸ்லாமிய இஸ்கந்தரா? = யாருக்கு வேணும் அதெல்லாம்? * ஒரு இஸ்லாமியர் என்னவாய் நினைத்துக் கொண்டு, அந்தத் திரையின் முன்னால் நிற்பார்? = யாருக்கு வேணும் அதெல்லாம்?
அவன், என்றுமே "அவன்" தான்! அவன் முன், யார் என்ன நினைத்துக் கொண்டு நின்றாலும், அவர்கள் அடியவர்களே! - வாழ்க சீர் அடியாரெல்லாம்! இதோ...ரமணி அம்மாளின் பாடலைக் கேட்டுக் கொண்டே, கதிர்காமத்து பதிவைப் படியுங்கள்! கதிர்காமக் கந்தனைக் கூத்தாடு மயிலே!!
அருகினில் நின்று அருள் புரியும் குகன் - கந்தன் அருமையாய் அந்தரங்கத்து இருக்கும் குகன் கருவிழி வள்ளிமானுக்கு உகந்த குகன் - கந்தன் திருவடித் தாங்கி நின்றே ஆடு மயிலே! (ஆடு மயிலே)
துள்ளித் துள்ளி விளையாடும் பால முருகன் - கந்தன் அள்ளி அள்ளி அருள் தரும் சீல முருகன் வள்ளியின் கரம் பிடித்த வேலன் முருகன் - கந்தன் திருவடித் தாங்கி நின்றே ஆடு மயிலே! (ஆடு மயிலே)
மனமது கனிந்திடில் மருவும் குகன் - கந்தன் கனவிலும் கண் சிமிட்டிக் காட்டும் குகன் தனதென தான் பரிந்து பேசும் குகன் - கந்தன் திருவடித் தாங்கி நின்றே ஆடு மயிலே! (ஆடு மயிலே)
அருகினில் நின்று அருள் புரியும் குகன் - கந்தன் ஆறுமுகம் கொண்ட சரவண முருகன் கூறும் அடியார்கள் வினை தீர்க்கும் முருகன் - கந்தன் திருவடித் தாங்கி நின்றே ஆடு மயிலே!!! (ஆடு மயிலே) மேலே சொன்ன தகவல் பலவும், படித்தும், கேட்டும், உணர்ந்தும் எழுதியதே! இது வரை நான் கதிர்காமம் சென்றதில்லை.... கால்களால் சென்றதில்லையே தவிர, மனத்தால் பல முறை சென்றுள்ளேன்! எங்கள் வள்ளியைச் சொல்லும் காடும் கழனியும் அல்லவா!
தன்னை ஏற்றுக் கொள்வானா என்று கூடத் தெரியாது, அவனுக்காகவே தன் வாழ்வை அமைத்துக் கொண்டவள்! பார்க்கவே பார்க்காத...பார்த்தாலும் ஏற்றுக் கொள்வானா என்று கூடத் தெரியாத ஒருவனுக்கு...ஒருத்தி, இப்படிக் காதலாய் நின்று விட்டாளே!
என் பால் நோக்காயே ஆகிலும், உன் பற்று அல்லால் பற்றில்லேன்! உன் அந்தமில் சீர்க்கு அல்லால், வேறு அகம் குழைய மாட்டேனே!!
இது...ஒரு கால்...ஒருதலைக் காதல் ஆகி இருந்தால்??? ஐயோ! எப்படியும் வள்ளி அவனிலே வாழ்ந்திருப்பாள்! ஆனால் முருகன் தான் தன்னிலே தாழ்ந்திருப்பான்! கதிர்காமம் பாடல் பெற்ற தலம்! அருணகிரியார் பதினான்கு திருப்புகழ்களாகப் பாடியுள்ளார்!
திருமகள் உலாவும் இருபுய முராரி திருமருக நாமப் பெருமாள் காண்! மருவும் அடியார்கள் மனதில் விளையாடு மரகத மயூரப் பெருமாள் காண்!
மணி தரளம் வீசி, அணி அருவி சூழ, மருவு கதிர்காமப் பெருமாள் காண்! அரவு பிறை வாரி, விரவு சடை வேணி அமலர் குரு நாதப் பெருமாள் காண்!
காண், காண் என்று வரிக்கு வரி காணச் சொல்கிறாரே! ஐயோ! கதிர்காமக் கந்தனை நான் காணும் நாள் எந்த நாளோ??? கதிர்காமம் அழைத்துச் செல்வதாக, முன்பு கா.பி அண்ணாச்சியும் மற்றும் ஸ்வாதியும் சொல்லி இருந்தார்கள்!
எவரும் ஏற்காத என்னைக் கதிர்காமத்து என் முருகனே ஏற்கட்டும்! வனமுறை வேடன் அருளிய பூஜை - மகிழ் கதிர்காமம் உடையோனே! இருநிலம் மீதில் எளியனும் வாழ - எனது முன் ஓடி, வரவேணும்!
கதிர்காமத்துறை கதிர்காமத்துரையே, என் முருகா... எனது முன் ஓடி வரவேணும்! பேதையை ஏற்க வரவேணும்!
காணாமல் போனவர் பற்றிய அறிவிப்பு! தமிழ்க் கடவுள் முருகன் என்பவனைக் காணவில்லை! வயது = ஆறில் இருந்து அறுபது வரை! உயரம் = 5 அடி 11 அங்குலம்! நிறம் = சிவப்பு (சேயோன்) சுருள் முடி, சூரியக் கண்கள் சுறுசுறு மூக்கு, சுவை இதழ்கள் ஆறிரு திண் புயத்து அழகிய மார்பு இஞ்சி இடுப்பு, இக-பர வளைவு அதற்கும் கீழே.... இல்லை...அதற்கும் மேலே...
இதயம்! - இது மட்டும் அவனுக்கு இருக்கவே இருக்காது!
மூவிரு முகங்கள் போற்றி, முகம் பொழி கருணை போற்றி என்று ஒப்புக்குப் பாடுவார்கள்! ஏன்? இதயத்தில் தானே கருணை பொழியும்? இவனுக்குத் தான் இதயமே இல்லையே! அதான் "முகம்" பொழி கருணை போற்றி என்று பாடல்!
பார்த்தவுடன் சொல்லவல்ல குணாதிசயங்கள்:
* மெத்த திமிர் பிடித்தவன் - பிடிவாதம் ஜாஸ்தி * கொஞ்சம் வீரன் - கையில் வேல் இருக்கும்! - ஆனால் அதை "விட" எல்லாம் தெரியாது! சும்மாத் "தொட" மட்டுமே தெரியும்! - தொளைபட்டு உருவத் "தொடு"வேலவனே, "தொடு"வேலவனே-ன்னு தான் இவனைச் சொல்லுவாங்க!
* சுமாரான அழகன் - மீசையில்லாத முகத்தை வச்சிக்கிட்டு ஊரை ஏமாற்றுபவன் * அலங்காரப் பிரியன் - ஷோக்குப் பேர்வழி! நல்லா டிரெஸ் பண்ணுவான்! உடம்பில் சந்தனம் போல ஒரு மெல்லிய வாசனை வீசும் * சரியான அலைஞ்சான்....பார்வை கண்டபடி மேயும்...மனம் முந்தியதோ, விழி முந்தியதோ, கரம் முந்தியதோ எனவே...
* நெற்றியில் மெல்லீசா மண்ணு போல திருநீறு இருக்கும்! அதை இவனே அப்பப்போ அழிச்சி விட்டுக்குவான்! * பைக் ஓட்டக் கூடத் தெரியாது! வெறும் மொபெட் தான்! அதான், தானே ஓடவல்ல திறமையுள்ள மயிலை ஏமாத்தி, தன் பிடிக்குள்ளாற வச்சிருக்கான்!
* இவனுக்கு வெற்றி இல்லை! வேலுக்குத் தான் வெற்றி! - வெற்றிவேல் என்று வேலைத் தான் கூப்பிடுவாங்க! இவனை அல்ல! இவன் சும்மா "தொடுவதோடு" சரி! மத்ததெல்லாம் வேலே தன் திறமையால் பார்த்துக்கும்! இந்த மாங்கா தான் என் காதலன்! இந்த poRkki தான் என் pokkisham! எல்லாம் என் விதி! - இவன் வந்து வாய்த்து விட்டான்! கருவாய், உயிராய், கதியாய், "விதியாய்" - வாய்த்து விட்டான்!
இவனைத் தான் பல நாளாக் காணவில்லை! ஆறு முகங்களைப் பார்த்து ஆறு மாசம் ஆகுது! என்னமோ ஒரு மாதிரியாகவே இருக்கு!
இவனைக் கண்டு பிடித்துத் தருவோர்க்கு, எந்தை, எம்பெருமான்.......அதான் இவன் மாமன்.... தக்க சன்மானம் கொடுப்பதாகச் சொல்லி இருக்காரு! - வைகுந்தம் புகுவது மண்ணவர் விதியே! யாராச்சும்....இந்தக் காணாமப் போனவனை....கண்டு பிடிச்சித் தருமாறு உங்களை இறைஞ்சுகிறேன்! டேய்...எங்க இருந்தாலும் வந்துருடா.....வந்துருவ தானே?
ஆறுமோ ஆவல்? ஆறுமுகனை நேரில்...காணாது.... இன்று முருகனருளில் இந்தப் பிரபலமான பாடல்! கேட்டுக்கிட்டே படிங்க! The Best of MLV - எம்.எல்.வசந்தகுமாரி - Must Listen!
ஏறு மயிலேறி, குன்றுதோறும் நின்று ஆடியவன் பெரும் புகழைத் தெரிந்தும், அவன் பேரழகைப்...பருகாமல் (ஆறுமோ ஆவல்?)
ஞான குருபரன் தீனத்தருள் குகன் வானவரும் தொழும் ஆனந்த வைபோகன் காணக் கிடைக்குமோ? கூறுதற்கு இல்லாமல் அற்புத தரிசனம், கற்பனை செய்தால் மட்டும்.... (ஆறுமோ ஆவல்?)
வரிகள்: கண்ணன் ஐயங்கார் ராகம்: மாண்டு தாளம்: ஆதி
* கண்ணன் ஐயங்கார் சிறந்த வைணவ அறிஞர்! இராமானுச தொண்டு குழுமத்தைச் சேர்ந்தவர்! அவர் பாடல்களில் என்றும் நிலைத்தது இந்த முருகன் பாட்டே! * மாண்டு என்பது துள்ளலான கம்பீர ராகம்! மாண்ட் என்று இந்துஸ்தானி இசையிலும் குறிப்பிடுவார்கள்! மாசிலா நிலவே நம்..., ஜாதி மல்லிப் பூச்சரமே போன்ற பாடல்கள் எல்லாம் இந்த மெட்டில் தான்! ஆறு முகத்தால், ஆறு மோகத்தால் - ஆறுமோ என் ஆவல்?
வாழ்வே கற்பனையாகிப் போனதா?... கற்பனையே வாழ்வாகிப் போனதா?... ஆறுமோ என் ஆவல்? செந்தூர் முருகா சேர்த்துக் கொள்!
எத்தனை பாடலய்யா எங்கள் முத்துக்குமரனுக்கு! அத்தனை பாடலுக்கும் பெரும் பக்திச் சுவையிருக்கு! சித்தம் இனித்திட வேலனை நினைத்திடுவோம்! பக்திக்கருள் தரும் பாலமுருகனைப் பாடிப் பணிந்திடுவோம்!!
பிள்ளைத்தமிழ் பாடக் குமரன் உள்ளம் களித்தாடும்! - அந்தப் புள்ளி மயிலோடு வடிவேல் துள்ளி விளையாடும்!
எத்தனை பாடலய்யா எங்கள் முத்துக்குமரனுக்கு! அத்தனை பாடலுக்கும் பெரும் பக்திச் சுவையிருக்கு! சித்தம் இனித்திட வேலனை நினைத்திடுவோம்! பக்திக்கருள் தரும் பாலமுருகனைப் பாடிப் பணிந்திடுவோம்!
ஆற்றுப்படைவீடு, திருமுறுகாற்றுப்படைவீடு! - சுவை ஊட்டும் தமிழோடு முருகனைப் போற்றிப் புகழ்பாடு!
சந்தநடைத்தமிழ் திருப்புகழ்தனில் கந்தனவன் வருவான்! சிந்தை குளிர்ந்திட சந்தன முருகன் நல்லருளைத் தருவான்!
எத்தனை பாடலய்யா எங்கள் முத்துக்குமரனுக்கு! அத்தனை பாடலுக்கும் பெரும் பக்திச் சுவையிருக்கு! சித்தம் இனித்திட வேலனை நினைத்திடுவோம்! பக்திக்கருள் தரும் பாலமுருகனைப் பாடிப் பணிந்திடுவோம்!
எத்தனை அருமையான பாடல்! எத்தனை அருமையான பாவம்! சீர்காழி கோவிந்தராஜன் ஐயா பாடிய இந்தப் பாடல் முருகனருள் பதிவைப் பார்த்துவிட்டுப் பாடியது போல் இருக்கிறது! :-) இந்தப் பாடலின் ஒலி வடிவத்தையும் வரி வடிவத்தையும் இங்கே இடுவதற்குத் தந்த பிரகாசம் ஐயாவிற்கு நன்றி!
இந்தச் செவ்வாயில், அன்பர்களின் செவ்-வாய் தோறும் மணக்கும் ஒரு அழகான முருகன் பாடல், TMS பாடியது! தித்திக்கும் தேன் பாகும், திகட்டாத தெள்ளமுதும், தீஞ்சுவை ஆகவில்லையே, முருகய்யா! தீஞ்சுவை ஆகவில்லையே! - ஏனாம்?
சர்க்கரை/வெல்லப் பாகு திகட்டும்! ஆனால் தேனில் எடுக்கும் பாகு திகட்டாது! - அதான் திகட்டாத தெள்ளமுது! ஆனாலும் அது கூடத் தீஞ்சுவை ஆகவில்லையாம்! ஏன்-ன்னு பின்னூட்டத்தில் சொல்லுங்க பார்ப்போம்! அதுக்கு முன்னாடி பாட்டை முதலில் பார்த்து விடுவோம்! முதலில் முருகன்! அப்பறம் ஆராய்ச்சி! ஓக்கேவா? :) இதோ...கேட்டுக் கொண்டே படிங்க!
சித்தம் மணக்கும் செல்வக் குமரன் பெயரினைப் போல சீர் மணம் வேறு இல்லையே - குமரய்யா - சீர் மணம் வேறு இல்லையே!
முத்தும் இரத்தினமும் முத்திறைப் பசும்பொன்னும் முதற் பொருள் ஆகவில்லையே - முருகய்யா - முதற் பொருள் ஆகவில்லையே!
சத்திய வேல் என்று சாற்றும் மொழியினைப் போல மெய்ப் பொருள் வேறு இல்லையே - குமரய்யா - மெய்ப் பொருள் வேறு இல்லையே!
எண்ணற்ற தெய்வங்கள் எத்தனை இருந்தாலும் எண்ணத்தில் ஆடவில்லையே - முருகய்யா - எண்ணத்தில் ஆடவில்லையே!
மண்ணுக்குள் மகிமை பெற்ற மாமலை முருகன் போல் மற்றொரு தெய்வமில்லையே - குமரய்யா - மற்றொரு தெய்வமில்லையே! (தித்திக்கும் தேன் பாகும்) இப்போ ஒவ்வொன்னா உன்னிச்சிப் பாருங்க...முருகனுக்காக, உன்னித்து எழுந்தன...உணர்வலைகள்! * தித்திக்கும் தேன்பாகும் திகட்டாத தெள்ளமுதும் தீஞ்சுவை ஆகவில்லையே = தீஞ்சுவை-ன்னா என்ன? தேன்பாகு, தெள்ளமுது எல்லாம் சுவையாத் தான் இருக்கு! ஆனால் "தீஞ்சுவை"யா?
* அத்தரும் ஜவ்வாதும் அள்ளியே பூசிடினும் அங்கம் மணக்கவில்லையே = என்ன அங்கம்? எப்படி மணக்கும்? * முத்தும் இரத்தினமும் முத்திறைப் பசும்பொன்னும் முதற் பொருள் ஆகவில்லையே = முதற் பொருள் எது? நீங்காத செல்வம் தான் முதற் பொருள்! அது எது?
* எண்ணற்ற தெய்வங்கள் எத்தனை இருந்தாலும் எண்ணத்தில் ஆடவில்லையே = எண்ணற்ற தெய்வங்களா? ஒன்றே குலம் ஒருவனே தேவன்-ன்னு அல்லவா கேள்வி? :) ஏன் முருகனைத் தவிர வேறு எந்த தெய்வ வடிவமும் எண்ணத்தில் ஆடலை-ன்னு பாடணும்? :) சொல்லுங்க பார்ப்போம், சொல்லுங்க!
உணர்வில் பெருகும் அன்புடன் அனுபவங்களையும் தொகுத்துத் தரும் இனிமையான பாடல் இது. இன்று காலையில் தான் முதன்முதலில் கேட்டேன். இது வரை பல முறை கேட்டுவிட்டேன். பாடியவர் இளையராஜா என்று குரலை வைத்துத் தெரிகிறது. இசையும் அவருடையதாகத் தான் இருக்கும். இயற்றியவர் யார் என்று தெரியவில்லை. அதுவும் அவரேயாக இருக்கலாம். வரிகளில் தெறிக்கும் அனுபவ உண்மைகளைப் பார்த்தால் அப்படித் தான் தோன்றுகிறது.
முருகனை நினை மனமே! - நலங்கள் பெருகிடும் தினம் தினமே! உருகிடும் மறு கணமே! - நெருங்கி வருவது அவன் குணமே! (முருகனை)
ஒவ்வொரு நொடியிலும் அருகினில் இருப்பவன்! ஒவ்வொரு செயலிலும் பெருமையைக் கொடுப்பவன்! உடலுக்கு உயிரெனில் உயிருக்கு ஒளி அவன்! உணர்ந்தவர் தொழுதிடும் உயர்ந்தவர் பரவிடும் முருகனை...
அழகனின் அழகினில் இருவிழி குளிர்ந்திடும்! அவன் விழி அசைவினில் கணைகளும் மலர்ந்திடும்! அவன் அருள் மழையினில் உணர்வுகள் சிலிர்த்திடும்! அறிவுடன் பொருள் புகழ் அனைத்திலும் சிறந்திட முருகனை ...
குருவும் சிஷ்யையும் சேர்ந்து பாடிப் பார்த்து இருக்கீங்களா? ரெண்டு பேருமே பிரபலமானவர்கள்! யாரு அவிங்க? MLV எனப்படும் எம்.எல்.வசந்தகுமாரி அவர்களைப் பற்றிப் பலரும் அறிவார்கள்! தமிழ் சினிமாவில் கலக்கிய ஸ்ரீவித்யா அவர்களின் தாயார்! எம்.ஜி.ஆரின் மன்னாதி மன்னன் படத்தில் வரும் "ஆடாத மனமும் உண்டோ?" என்ற ஹிட் பாடலைப் பாடியவர்! மேடையிலும் சினிமாவிலும் பல தமிழ்ப் பாடல்களைப் பாடிப் பிரபலப்படுத்தியவர்!
கர்நாடக இசை உலகில் கோலோச்சிய பெண் மும்மூர்த்திகளில் எம்.எல்.வி-யும் ஒருவர்!
* எம்.எஸ் அம்மா = ஆத்மார்த்தமான பக்திப் பொழிவு என்றால்
* எம்.எல்.வி = மேதைமை தவழும் இசை கம்பீரம்!
இவரின் சீடர் தான், இன்று பிரபலமான பாடிகியாக வலம் வரும் திருமதி சுதா ரகுநாதன்!
கர்நாடக இசையில் கொடி கட்டிப் பறக்கும் பெண் கலைஞர்களில் இவரும் ஒருவர்! பார்த்திபனின் இவன், உளியின் ஓசை, வாரணமாயிரம், ஆதவன் போன்ற பல திரைப்படங்களிலும் பாடி உள்ளார்!
இந்தக் குருவும் சிஷ்யையும் சேர்ந்து பாடிப் பார்த்து இருக்கீங்களா? முருகனருளில் இன்னிக்கி பார்க்கலாமா? இதோ குரு-சிஷ்யை முருகன் பாட்டு!
முருகனின் மறுபெயர் அழகு - அந்த முறுவலில் மயங்குது உலகு!
(முருகனின்)
குளுமைக்கு அவனொரு நிலவு குமரா எனச் சொல்லிப் பழகு!
(முருகனின்)
வேதங்கள் கூறிடும் ஒளியே - உயர் வேலோடு விளையாடும் எழிலே! துறவியும் விரும்பிய துறவே - நீ துறவியாய் நின்றிட்ட திருவே!
(முருகனின்)
வரிகள்: குரு சூரஜானந்தா
ராகம்: பெஹாக்
தாளம்: கண்ட சாபு
என் முருகனின் முறுவலில் மயங்குது மனம்! அவன் குளுமையாமே! பாவி, என்னைச் சிரித்து சிரித்து மயக்கிச் சூடாக்கியவன்...குளுமைக்கே நிலவாய் இருக்கிறானாமே! போகட்டும்! அது என்ன துறவியும் விரும்பிய துறவு? சொல்லுங்க பார்ப்போம்!
அது கூடப் பரவாயில்லை! "துறவியாய் நின்றிட்ட திருவே!"-ன்னு பாடுறாங்களே? அவன் ரெண்டு பொண்டாட்டிக்காரன்! அவன் எப்படிய்யா துறவியாய் நின்றிட்டவன்? சொல்லுங்க பார்ப்போம்! :)
கீழ்வானம் சிவக்கும்-ன்னு ஒரு படம் வந்துச்சி! சிவாஜி-சாவித்திரி மாதிரி, சிவாஜி-சரிதா காம்பினேஷன்-ன்னு வச்சிக்குங்களேன்! ரெண்டு பேரும் மாமனார்-மருமகளா போட்டி போட்டுக்கிட்டு நடிச்சி இருப்பாங்க!
நாங்க எல்லாரும் சென்னைக்கு வந்த போது...புரசைவாக்கம், Roxy தியேட்டரில் (இப்போ இந்த தியேட்டரே இல்ல, அடுக்கு மாடி சரவணா ஸ்டோர்ஸ் ஆகி விட்டது வேறு விஷயம்)... ஒரே மாசத்தில் நாலைஞ்சு பழைய படங்களை எல்லாம் ஓட்டினாங்க! சிவாஜி ஹிட் படங்கள்! அதுல இதுவும் ஒன்னு! எப்படி ஞாபகம் இருக்கு-ன்னா...
1. சென்னையில், நாங்க எல்லாரும் சேர்ந்து பார்த்த முதல் படம் இது! 2. தியேட்டருக்கு கீழேயே, White Field Bakery! சின்னப் பையன் எனக்கு, அந்த கேக் வாசனையும், பட்டர் பிஸ்கட் வாசனையும்...ஆஆ... 3. இந்தப் படத்தில் வரும் - "முருகா முருகா முருகா" பாட்டு!
இந்தப் பாட்டில், ஒரு வீட்டுத் தோட்டத்தின் நடுவே முருகன் சிலை இருக்கும்! அங்கே நின்னுக்கிட்டு, சிவாஜியும் சரிதாவும், மாறி மாறிப் பாடுவாங்க! என்னமோ தெரியலை, அந்த முருகன் சிலை எனக்கு ரொம்ப பிடிச்சிப் போச்சி!
"அப்பா, மெட்ராஸ்-ல்ல வாடகை வீடு நல்லாவே இல்லை! ரொம்ப குறுகல்! நாம சொந்தமா வீடு கட்டிக்கிட்டுப் போனா, சின்ன தோட்டமாச்சும் வைக்கணும்! நடுல, இதே போல ஒரு முருகன் சிலை வைக்கணும்!"-ன்னு சொல்லிய ஞாபகம்...எனக்கே இருக்கு! :)
படத்துக்கு வருவோம்! சிவாஜி, பெரிய மருத்துவர்! அவரு பையன் சரத்பாபு - மருமகள் சரிதா! ரொம்ப பாசமா இருப்பாங்க மாமனாரும் மருமகளும்! அப்போ....பார்வையற்ற ஜெய்சங்கர், கண் அறுவை சிகிச்சை செஞ்சிக்க, சிவாஜி கிட்ட வருவாரு! தன் தங்கையின் வாழ்வைக் கெடுத்தவனைக் கொலை பண்ணும் வெறியில் இருப்பாரு! அவர் கையில் இருக்கும் புகைப்படத்தைப் பார்த்த சிவாஜிக்கு செம ஷாக்!
தன் பையன் சரத்பாபுவைப் போட்டுத் தள்ளத் தான் ஜெய்சங்கர் வந்திருக்காரு-ன்னு தெரிஞ்ச பிறகும், சிகிச்சை செய்வாரு சிவாஜி! ஆனா Doctor vs Father உணர்ச்சிப் போராட்டத்தில் அப்பப்போ தவிப்பாரு! இதனால், சரிதா, சிவாஜி மேல சந்தேகப்பட்டு, வெறுப்பும் கோபமும் தானாவே வளர்த்துக்குவாங்க! ஆனா தன் கணவன் தான் அதில் உள்ளான்-ன்னு தெரியாது!
தன் புருஷன் தான் இதுல Involved-ன்னே தெரியாம, சிவாஜியைத் தாறுமாறாகச் சரிதா பேச...கதை விறுவிறு-ன்னு போகும்!
சிவாஜியைப் பொய்யர், புரட்டர், மருத்துவத் துரோகி-ன்னு எல்லாம் பேசிய அந்தப் பாசமிகு மருமகள்...சான்சே இல்லை! சிவாஜிக்கு ஈடு குடுத்து நடிக்கவல்ல ஒரே பின்னாளைய கதாநாயகி = சரிதா! முதல் மரியாதை ராதா கூட அப்புறம் தான்! பாட்டைக் கேளுங்க!
முருகன் முன்னாடி... * குற்றம் சாட்டி ஒதுக்கும் ஒரு உள்ளமும், * குற்றவாளி "ஆக்கப்பட்டு" அழும் இன்னொரு உள்ளமும், மாறி மாறி மோதும் காட்சி!
சரிதா: கண் கண்ட தெய்வமே, கை வந்த செல்வமே, முருகா முருகா முருகா! என்னென்ன சொல்கின்றார், என்னென்ன செய்கின்றார்? சில உள்ளதுக்குள் கள்ளம் வைத்தது - உன் வேலையா? வேலய்யா இது உன் வேலையா?
சிவாஜி: கண் கண்ட தெய்வமே, கை வந்த செல்வமே முருகா முருகா முருகா முருகா முருகா முருகா
சரிதா: சுந்தர வேல்முருகா, துண்டுகள் இரண்டாக சூரனைக் கிழித்தாய் அன்றோ! - ஒரு தோகையைக் காலடியில், சேவலை கை அணைவில் காவலில் வைத்தாய் அன்றோ!
சிவாஜி: பிள்ளையைக் கொன்றுவிட்டு, பெரிய விருந்து வைத்தான் கள்ளமில் பரஞ் சோதியே - விருந்து எல்லாம் முடிந்த பின்னே, பிள்ளையினை அழைத்தான் இறைவன் அருள்ஜோதியே!
சரிதா: காரிருள் சூழ்ந்ததும் கதிரும் மறைந்தது - நீதி எல்லாம் துடிக்கும்! சிவாஜி: மேற்கினில் சூரியன் மறைந்தாலும் - கீழ் வானம் சிவக்கும்! சரிதா: கந்தன் இருப்பது உண்மை என்றால் இது உண்மைகள் வெளியாகும்! சிவாஜி:காலம் வரும் வரை காத்திருந்தால் அது நல்லவர் வழியாகும்!!
இருவரும்:கண் கண்ட தெய்வமே! கை வந்த செல்வமே! முருகா முருகா முருகா!முருகா முருகா முருகா! சில உள்ளதுக்குள் கள்ளம் வைத்தது - உன் வேலையா? வேலய்யா இது உன் வேலையா?-ன்னு அது கேட்க... சில உள்ளதுக்குள் உள்ளம் வைத்தது - உன் வேலையா? வேலய்யா இது உன் வேலையா?-ன்னு இது கேட்க...
பாவம், என் முருகன் என்ன தான் பண்ணுவான்? ரெண்டு பேருமே முருகனைத் தான் துணைக்கு கூப்பிடறாங்க! யாரை-ன்னு அவன் பாக்குறது?
அவன் அர்ச்சனையைப் பார்ப்பதில்லை! = லட்சார்ச்சனை லட்சம் பேர் செய்யறாங்க....ஒரு டிக்கெட் ரூ100.00 தான்! ஆட்களைப் பார்ப்பதில்லை! அவனோட பேரை, நிறைய வாட்டி ஒருவர் சொல்வதாலேயே அவர்களைப் பார்ப்பதும் இல்லை! = சரவணபவன் அண்ணாச்சி சொல்லாத முருகன் பேரா?
பின்பு எதைப் பார்க்கிறான் முருகன்?
சில உள்ளதுக்குள் கள்ளம் வைத்தது உன் வேலையா? வேலய்யா இது உன் வேலையா? என்று ஒரு உள்ளம் குற்றம் சாட்டும் போது... தன்னையும், தன்-மானத்தையும், தன் மகிழ்வையும்... அன்புக்காகவே இழக்கத் துணிந்த அந்த அன்பு...அடைக்கும் தாழ் இல்லாத அன்பு
= அந்த உருக அன்பு ஒன்றினையே, முருகன் பார்க்கிறான்! போதும் நீ பட்டது; வா என்னிடம் என்று வாரி அணைத்துக் கொள்கிறான்!
பெருகாதல் உற்ற தமியேனை நித்தல் பிரியாதே! பட்சம் மறவாதே! கை வந்த செல்வமே! என் - முருகா முருகா முருகா!
முன்பு கண்ணன் பாட்டில், பித்துக்குளி ஹிட்ஸ் வரிசையில், "பால் வடியும் முகம் நினைந்து நினைந்தென் உள்ளம்" என்ற Fast Beat கண்ணன் பாட்டைப் பார்த்தோம் அல்லவா?
அதே அலைவரிசையில், பித்துக்குளியார் முத்துக் குளித்த முருகன் பாடல்களை, முருகனருள் வலைப்பூவிலும் தொடர்ந்து காண்போம்! வாருங்கள்!
இன்று மிகவும் இயைந்து வரும் தினம்! மூவரின் பிறந்த நாள்!
1. தமிழ்க் கடவுள் - என் காதல் முருகப் பெருமான்
2. வேதம் தமிழ் செய்த மாறன் சடகோபன் (எ) நம்மாழ்வார்
இருவருமே வைகாசி விசாகத்தில் தோன்றியவர்கள் தான்!
இந்த ஆண்டோ, வைகாசி விசாகம், May-27 அன்று வருவதால்...
இவர்களுடன் சேர்ந்து பிறந்தநாள் கொண்டாடிக் கொள்ளும்...
நாம் புகழாததால், நாம் வணங்காததால், நாம் நினைக்காததால் ஆண்டவன் நம்மை ஒரு போதும் தண்டிக்கப் போவதில்லை. ஆண்டவன் அனைவருக்கும் பொதுவானவர். தன்னை வணங்காதவரைத் தண்டிக்க அவர் இரண்டாந்தர எஜமானன் இல்லை. அவர் அனைவருக்கும் பொது. நல்லவருக்கு ஆன அதே இறைவனே தீயவனுக்கும். இருவரையும் வாழ்விக்க வேண்டிய கடமை ஆண்டவனுக்கு உண்டு.
போருக்குப் போகிறான் சூரன். அவனது முகம் கடுகடுவென இருக்கிறது. செக்கச் சிவந்து இரத்த நிறத்தில் இருக்கிறது. கண் பார்வையில் அனல் பறக்கிறது. முருகனை ஒரு பிடி பிடிக்கவேண்டும் என்ற வெறியோடு போகிறான். போர்க்களத்தில் முருகனும் நிற்கின்றார். முருகனைப் பார்த்த சூரனுக்கு வியப்பு. பின்னே. புன்னகை தவழ குளிர் முகத்தோடு வந்து நின்றால்?
ஆக சூரனுக்குத் தான் முருகன் மேல் ஆத்திரம். ஆனால் முருகனுக்கோ சூரன் மேல் அன்பு. குளிக்காமல் போவதால் ஆறு நம் மீது கோவிக்குமா? நாம் குளிக்கப் போனால் நம்மைத் தூய்மைப் படுத்துவது ஆறு. அப்படித்தான் முருகக் கடவுளும். நாம் வணங்கினால் நம்மை வாழ்விப்பார். நாம் வணங்காமல் போனால் நம்மை கோவிக்கவே மாட்டார்.
இறைவன் அனைவருக்கும் பொதுவானவன் என்று உணர்த்தும் தத்துவம். இது தமிழுக்கு மட்டுமே உரியது.
சரி......பித்துக்குளி-ன்னாலே என்ன ஞாபகத்துக்கு வரும்?
எனக்கு என் முருகன் ஞாபகம் வருவான்! :) அப்பறமா முருகதாஸ்-இன் கூலிங் க்ளாஸ், தலையில் காவி Scarf! :)
மனுசன் அப்பவே என்ன ஸ்டைலா இருக்காரு-ன்னு பாருங்க! :))
பித்துக்குளி முருகதாஸ் அவர்களின் இயற்பெயர் பாலசுப்ரமணியம்! கோயம்புத்தூர் காரரு!
இந்தக் கொங்கு நாட்டுத் தங்கம், எதையும் கொஞ்சம் வித்தியாசமா பண்ணும்!
நல்ல கர்நாடகப் பாடல்களை, அப்படியே இழு இழு-ன்னு இழுக்காம, கூட்டான பஜனை ஸ்டைலில், மக்களோடு மக்களாச் சேர்ந்து, அழகாகப் பாடிக் காட்டியவர்!
இதனால் தான், இந்தக் காலத்திலும், ஹார்மோனியம் மட்டுமே வச்சிக்கிட்டு, கல்லூரி மாணவர்களைக் கூடப் பித்துக்குளிக்கு, "ஓ" போட வைக்குது!
Fast Beat காவடிச் சிந்தை, செஞ்சுருட்டி/நாதநாமக் கிரியை-ன்னு ராகத்தில் போடறது தப்பில்லை! ஆனா காவடிச் சிந்தின் அந்த ஜீவனான "துள்ளல்" போயிறக் கூடாதுல்ல?
சில பண்டிதர்கள் அதை இழுத்து இழுத்தே ஜீவனைப் போக்கிருவாங்க! :)
ஆனால் நம்ம பித்துக்குளியாரின் காவடிச் சிந்தைக் கேட்டுப் பாருங்க! "சுருட்டி" ராகமும் இருக்கும்! காவடியைச் "சுருட்டிக்"கிட்டு போகாமலும் இருக்கும்! :)
சான்றாக, இந்தப் பாட்டையே எடுத்துக்கோங்களேன்! = சிந்திக்கிலேன் நின்று சேவிக்கிலேன்!
அன்பே...உன்னைச் சிந்திக்கவே இல்லை....ஒருநாளும்!
அன்பே...உன்னைச் சேவிக்கவே இல்லை....ஒருநாளும்!
இந்தப் பாடல் = சிந்திக்கிலேன் நின்று சேவிக்கிலேன்...
அருணகிரிநாதர், தம் வாயாலும் மனத்தாலும் அலங்காரம் செய்து பார்த்த கந்தர் அலங்காரப் பாடல்! - இதை முருகதாஸ் எப்படி Handle பண்றாரு?
* திருப் பரங்கிரி தனில் உறை, சரவண பெருமாளே-ன்னு, திருப்புகழை Hum பண்ணி ஆரம்பிக்கறாங்க திருமதி. பித்துக்குளி - தேவி சரோஜா!
* அடுத்து, சிந்திக்கிலேன்ன்ன்ன்ன்ன் என்று ஏன்ன்-கறாரு, ஏங்கறாரு பித்துக்குளி! - கந்தர் அலங்காரம்!
* கந்தர் அலங்காரத்தில் இருந்து மீண்டும் திருப்புகழுக்குத் தாவறாங்க! ஒரு டெம்ப்போ உருவாக்க, மெல்லிய பஜனை...மக்களோடு!
கேட்டுக்கிட்டே பதிவை வாசிக்க, இதோ சொடுக்குங்கள்: பித்துக்குளியின் மாயக்குரலில்!
சிந்திக்கிலேன், நின்று சேவிக்கிலேன், தண்டைச் சிற்றடியை
வந்திக்கிலேன், ஒன்றும் வாழ்த்துகிலேன், மயில் வாகனனைச்
சந்திக்கிலேன், பொய்யை நிந்திக்கிலேன், உண்மை சாதிக்கிலேன்,
புந்திக் கிலேசமும் காயக் கிலேசமும் போக்குதற்கே!!!
சிந்திக்கிலேன் = முருகா உன்னைப் பற்றி உள்ளத்தில் கொஞ்சமும் சிந்திக்கவில்லை
நின்று சேவிக்கிலேன் = உன்னை "நின்று" சேவிக்கவில்லை! "நின்று" வணங்கவில்லை
தண்டைச் சிற்றடியை வந்திக்கிலேன் - அணிமணி தண்டை அணிந்த உனது செந்தாமரைப் பாதங்களை நான் கண்டு வழிபடவில்லை
ஒன்றும் வாழ்த்துகிலேன் - ஒருமுறையாவது உனது பெயரைச் சொல்லியும் புகழைப் பாடியும் வாழ்த்தவில்லை
மயில் வாகனனைச் சந்திக்கிலேன் - மயில் மீது அமர்ந்த ஐயனே உன்னைத் தேடி வந்து சரணடையவில்லை
பொய்யை நிந்திக்கிலேன் உண்மை சாதிக்கிலேன் - பொய்யை நிந்தித்து உண்மையே பேசி வாழவில்லை. (பொய்யா விளக்கே விளக்கு என்கிறார் வள்ளுவர். அத்தோடு பொய்மையும் வாய்மையிடத்து புரை தீர்த்த.)
புந்திக் கிலேசமும் - அறிவில் ஏற்படும் துன்பமும்
காயக் கிலேசமும் - உடலில் ஏற்படும் துன்பமும்
போக்குதற்கே - தீர்வதற்கே!
முருகா, உன்னைப் புகழ்ந்து ஒன்றும் சொல்லாது போனாலும், உன்னை வணங்காது போனாலும், உனது புகழைப் பாடாது போனாலும்...
உடலால், மனதால் அடையும் துன்பங்களைக் களைந்து, எங்களைக் காக்கின்ற உன் கருணைக்கு அளவுண்டோ!
சிந்திக்கிலேன் = சரி!
அது என்ன "நின்று" சேவிக்கிலேன்?
சொல்லுங்க பார்ப்போம்! "நின்னாத்" தான் சேவிக்க முடியுமா?
நடந்தோ, உட்கார்ந்தோ, படுத்தோ, மனசாலயே சேவிக்க முடியாதா?
தரையில் உருண்டு, அங்கப் பிரதட்சிணம் செய்து, படுத்து எல்லாம் சேவிக்கிறாங்களே! ஏன் அருணகிரி, "நின்று" சேவிக்கிலேன் என்பதை மட்டும் குறிப்பிட்டுச் சொல்லுறாரு? சொல்லுங்க பார்ப்போம்!
பின்னூட்டத்தில் நீங்கள் "நின்று" பேசிய பின், நாளைக்கி இங்கு செல்லுங்கள்!
அங்கே விடை உண்டு!
முருகக் கொடை உண்டு!
மயிலின் நடை உண்டு!
தடைக்குத் தடை உண்டு!
சிவாஜி படத்தில் முருகன் பாட்டு இருக்கு-ன்னு பலருக்கும் தெரியும்! படம் = கந்தன் கருணை! வெற்றிவேல், வீரவேல்-ன்னு, சிவாஜி வீரவாகு போல் Walking Style காட்டுவாரு! இதோ அந்தப் பதிவு! ஆனால், எம்.ஜி.ஆர் படத்தில்? எம்.ஜி.ஆர், முருகன் பாட்டு பாடி இருக்காரா என்ன? அட, பாட்டு என்ன? எம்.ஜி.ஆர் முருகனாவே வேஷங் கட்டியிருக்காருப்பா! ஒரே ஒரு பாட்டுக்குப் புரட்சித் தலைவர் எம்.ஜி.ஆர் முருகனாக நடிக்க, ஜெயலலிதா வள்ளியாக நடித்தார்! இதைத் தேர்தல் போஸ்டர்களில் கூடச் சிலர் பார்த்திருக்கலாம்! படம் = தனிப் பிறவி!
இன்னொரு படம் = உழைக்கும் கரங்கள்! நாளை உலகை ஆள வேண்டும், உழைக்கும் கரங்களே-ன்னு பாட்டு வருமே! அந்த எம்.ஜி.ஆர் படம்! அதில் கந்தனுக்கு மாலையிட்டாள்-ன்னு ஒரு முருகன் பாட்டு! அதை வாணி ஜெயராம் மிக நேர்த்தியாகப் பாடி இருப்பாய்ங்க! வீணை இசையோடு காதல் இசை! நடிகை பவானி பரதநாட்டிய நடனக் கலைஞர்! எம்.ஜி.ஆர் மேல் அதீத அன்பும் காதலும் கொள்வார்! எம்.ஜி.ஆரும் அன்பு செலுத்துவது போல் இருக்கும்! ஆனால் அது ஏனோ காதலாக மலராது! அப்புறம் எம்.ஜி.ஆர் லதாவைக் கரம் பிடிப்பார்! எம்.ஜி.ஆரும்-லதாவும், பவானி வீட்டிலேயே அடைக்கலம் கொள்வார்கள்! அன்று முதல் இரவு!
அவர்கள் முதலிரவுக்கு வேண்டிய அனைத்தையும் பவானியே செய்ய வேண்டிய இக்கட்டான நிலைமை! பாவம்...அவள் மனம் பதபதைக்கும்! இருப்பினும் பழைய காதலன் மேல் உள்ள மாறா அன்பால் அதையும் செய்வாள்! தம்பதிகளை முதலிரவு அறைக்கு அனுப்பி விட்டு, இவள் மட்டும் தனி அறையில்...
உள்ளத்தை இழந்தவள், உயிரை இழந்தவள் அல்லவா? இனி ஒன்றுமே இல்லை என்று எல்லாமே இழந்தவளுக்கு... இனி ஏது அடைக்கலம்? = முருகன் மட்டுமே அடைக்கலம்! கந்தனுக்கு மாலையிட்டாள்! கந்தனுக்கு மாலையிட்டாள்!
கந்தனுக்கு மாலையிட்டாள் கானகத்து வள்ளி மயில் கல்யாண கோலத்திலே கவிதை சொன்னாள் காதல் குயில்!
சொக்கருடன் மீனாட்சி சொக்கி நிக்கும் திருக்காட்சி காண வந்த கண்கள் ரெண்டும் காதலுக்கு ஒரு சாட்சி!
பூவோடு பொட்டும் தந்தேன்! ஒரு பூவைக்கு வாழ்வு தந்தேன் சலங்கை கட்டும் இல்லத்திலே தாலி கட்டும் நடக்க கண்டேன்!
மனமே முருகனின் மயில் வாகனம் - என் மாந்தளிர் மேனியே குகன் ஆலயம் - என் குரலே செந்தூரின் கோவில் மணி - அதில் குகனே சண்முகனே என்றொலிக்கும் இனி!
குரல்: ராதா ஜெயலட்சுமி வரிகள்: கொத்தமங்கலம் சுப்பு இசை: MSV படம்: மோட்டார் சுந்தரம் பிள்ளை ராகம்: இந்தளப் பண்/ஹிந்தோள ராகம்
MSV இந்தளப் பண்ணில் கையே வைக்காம, சினிமாவுக்காக அட்ஜஸ்ட் பண்ணாம, அப்படியே ராகத்தைக் கொடுத்துட்டாரு போல! அருமையாப் பாடி இருக்காங்க ராதா ஜெயலட்சுமி! செளகார் ஜானகி வீணை வாசிக்கறது தெரியுது! பாடும் நடிகை யாரு-ன்னு தெரியலை! அழகா நளினமா இருக்காங்க!மனம் எப்படி முருகனின் வாகனம் ஆகும்? மனத்தின் வேகம் போல, வேற ஒன்னும் இல்லை! Rocket-இல் செயற்கைக் கோள் விட்டாக் கூட, நிலவில் போய் இறங்க கொஞ்சம் நாளாவும்! ஆனால் மனம் அடுத்த நொடியில் போய், நிலவில் சேவல் கொடி பதிக்கும்! :)
ஆனா மனம் அது மட்டும் தான் செய்யுமா? வேற பலான பலான விடயம் கூடச் செய்யும்! அமலா, பாவனா, இலியானா வீட்டுக்கு எல்லாம் கூடப் போய் வரும்! :)
அப்படி அலை பாயுற மனசு! ஆனா அதை மயில் வாகனமா ஆக்கிட்டா?
மயில் மேல வேற யாராச்சும் ஒருத்தரு ஏறுவாங்களா? அவன் ஒருத்தன் மட்டும் தானே ஏறுவான்! அவனுக்கே நான்! அவனுக்கே நான்!
மற்றாரும் பற்றில்லேன்!
நானே அவனோட மயில்! சூரனை மயிலாய் மாற்றியது எல்லாம் அப்புறம் தான்! அதற்கும் முன்பே முருகனுக்கு மயில் வாகனம் உண்டு! நானே அவனோட ஆசை மயில்!
என் மாந்தளிர் மேனியே குகன் ஆலயம் = இதுக்கு என்னா சொல்றது! வெட்கமா இருக்கு! பேசாம கீழே இருக்குற படத்தைப் பார்த்துக்கிடுங்க :)
ஆனா ஒன்னு மட்டும் சொல்லுறேன்!
* என் மேனி, வெளியிலும் அவனுக்குத் தான் = மயிலாக
* என் மேனி, உள்ளேயும் அவனுக்குத் தான் = ஆ+லயமாக = அவன் லயமாக!
இந்தப் பாடல் முருகருளில் இம்புட்டு நாள் வராதது தான் வியப்பு! அதனாலென்ன? எப்போது எதை வெளிப்படுத்த வேணும் என்று நம்மைக் காட்டிலும் நன்மை காட்டும் முருகனுக்கு அல்லவா தெரியும்! அந்த அருள் முகத்தைப் பார்த்துக் கொண்டே இருப்பது மட்டுமே பேதைக்குத் தெரியும்!
இந்தப் பாட்டைப் படிக்கும் போதும், பாடப் பக்கம் நின்று கேட்கும் போதெல்லாம்... அதுவும் TMS குரலில்... இந்தச் செவ்வாயில், செவ் வாய் மணக்க, சேயோனை...இதோ...கேட்டுக்கொண்டே வாசியுங்கள்!
முருகனைக் கூப்பிட்டு முறையிட்ட பேருக்கு முற்றிய வினை தீருமே! உடல் பற்றிய பிணி ஆறுமே! வாழ்க்கை முற்றிலுமே நலம் பெற்று இனிதுற மெத்த இன்பம் சேருமே!! (அப்பன் முருகனைக் கூப்பிட்டு)
குமரனைக் கும்பிட்டுக் கொண்டாடு வோருக்கு குறைகள் யாவும் போகுமே! அவர் குடும்பம் தழைத் தோங்குமே! சூர சமர வேலாயுதன் பக்கத் துணை கொண்டால் சகல பயம் நீங்குமே!! (ஐயன் முருகனைக் கூப்பிட்டு)
அறுமுகனை வேண்டி ஆராதனை செய்தால் அருகில் ஓடி வருவான்! அன்பு பெருகி அருள் புரிவான்! அந்தக் கருணை உருவான குருபரன் என்றுமே கைவிடாமல் ஆளுவான்!! (அப்பன் முருகனைக் கூப்பிட்டு)
கந்தனை எண்ணியே வந்தனை செய்வோர்க்கு காரியம் கைகூடுமே! பகை மாறி உறவாடுமே! சிவ மைந்தன் அருளாலே மெய்யறிவுண்டாகி மேன்மை உயர்வாகுமே!! (ஐயன் முருகனைக் கூப்பிட்டு)
என்றுமே கைவிடாமல் ஆளுவான்
ஐயன் முருகனைக் கூப்பிட்டு... ஐயன் முருகனைக் கூப்பிட்டு... என் ஐயா...என் ஐயா... இனியும் நான் உன்னைக் கூப்பிடாது, நீ என்னைக் கூப்பிட்டுக் கொள்!
